Qaırat Nurtas aýyr dertke shaldyqqan qyzdyń armanyn oryndady
«Pedıatrııa jáne balalar hırýrgııasy ǵylymı ortalyǵy» baspasóz qyzmetiniń málimetinshe, jaqynda ǵana otadan shyqqan Aıdana súıikti ánshisin bir kórýdi armandaǵan eken. Kishkentaı jankúıerimen tanysqan ánshi Aıdanaǵa jáne barsha onkogematologııa bóliminde em alýshy balalarǵa aq tilegin bildirip, tez saýyǵyp ketýlerin tiledi. Qaırat Nurtas basqa bólmelerde jatqan balalardyń da qal-jaǵdaılaryn surap, áńgimelesken.
«Kishkentaı qyzdyń bir aýyz tilegin oryndaǵan aq júrekti Qaırat Nurtasqa jáne kezdesýdi uıymdastyrýǵa muryndyq bolǵan «Amıla» qoryna alǵysymyzdy bildiremiz. Nıeti men tilegi qabyl bolsyn! Bul kezdesý balalardyń syrqattan saýyǵyp ketýlerine septigin tıgizedi degen úmittemiz. Ata-analaryna tózimdilik pen sabyr, senim men úmit tileımiz! Dúnıede eshqandaı sábı aýyrmasyn, aýrý ataýly ananyń kóńiline qaıaý túsirmesin! Qaıyrymdy, meıirimdi, keń peıildi bolý qazaq halqynyń qanynda bar qasıet. Bul dúnıede ananyń kóz jasy men balanyń aýyrǵanyn kórýden artyq qasiret joq. Mundaı taǵdyrdy eshkim ózine tilep almaıdy. Ár júrekke meıirimdilik, izgilik, adamgershilik tárizdi asyl qasıetterdi uıalatý, qınalǵan jandarǵa qoldaý kórsetý, taǵdyrdyń jazýymen jaraly bolǵandarǵa járdem berý árbir azamattyń paryzy», - delingen ortalyq taratqan málimette.
