Qaırat Nurtas Almatyda jasyryn ótkizilgen toıda bolǵan
ALMATY. QazAqparat – Almatyda mereke kúnderi jumysyn toqtatpaǵan taǵy bir meıramhana anyqtaldy. Monıtorıng toby pen qalalyq shtabtyń mamandary birlesip, kóńil kóteretin orynnyń ishine 3 saǵat degende ázer kirdi. Kúsheıtilgen karantın talaptaryn saqtamaǵan qonaqtardyń arasynda elge tanymal ánshi de boldy, dep habarlaıdy QazAqparat tilshisi.
Respýblıkalyq arnaıy monıtorıng toby tóraǵasynyń orynbasary Rafael Gasanov Facebook - tegi paraqshasynda túngi ýaqytta jasyryn túrde toı ótkizip jatqan meıramhananyń vıdeosyn jarııalady.
«Biz eki saǵattan astam ýaqyt boıy «Laureate» meıramhanasynda qonaqtardyń bar-joǵyn bilýge tyrystyq, beker kútpegen ekenbiz. Meıramhanada júzden astam adam bar ekeni anyqtaldy. Árıne, tóbeles te boldy. Jalpy, barlyǵy vıdeoǵa túsirildi», - dep jazdy Rafael Gasanov.
Oqıǵa Medeý aýdanynda bolǵan. Monıtorıng top múshelirimen BAQ ókilderi ǵımarat ishine kirgen kezde, qonaqtar burysh-buryshqa tyǵylyp, betterin kórsetpeýge tyrysty. Olardyń arasynda tanymal ánshi Qaırat Nurtas ta bar.
