Qaırat Nurtas 15 táýlikke qamalady - Sot qaýlysy

ASTANA. KAZINFORM – Astana qalasynyń ákimshilik ister boıynsha mamandandyrylǵan soty Qaırat Nurtastyń buzaqylyq isi boıynsha qaýly shyǵardy.

«Qaırat Nurtasuly Aıdarbekov jáne Asylbek Baqytjanuly Bekqaıyrov arasyndaǵy bitimgershilikke kelý týraly kelisim bekitilsin. Ákimshilik quqyqbuzýshylyq týraly kodekstiń 73-1 babynyń 1-bóligi boıynsha Qaırat Nurtasuly Aıdarbekovke qatysty is eki jaqtyń tatýlasýyna baılanysty toqtatylsyn», - dep jazylǵan sot úkiminde.

Sondaı-aq Qaırat Nurtasuly Aıdarbekov QR Ákimshilik quqyqbuzýshylyq týraly kodekstiń 434-baby 2-bóligi boıynsha kináli dep tanyldy jáne oǵan 15 táýlikke qamaýǵa alý jazasyn taǵaıyndaldy.

Biraq Qaırat Nurtas 15 táýlik merzimin taǵy da qysqartýǵa múmkindik suraýda.

Eske sala ketsek, «Almaty-Astana» baǵytyndaǵy áýe reısinde usaq buzaqylyq jáne densaýlyqqa qasaqana jeńil zııan keltirý faktisi boıynsha ákimshilik is qozǵalǵan edi.

Buǵan deıin sot otyrysynyń qalaı ótkeni baıandalǵan bolatyn.