Qaırat Nurǵazın óner súıer qaýymǵa jańa ánderin tanystyrdy
ASTANA. QazAqparat - Astana qalasyndaǵy «Talant» halyqaralyq óner ortalyǵynda ánshi, kompozıtor, respýblıkalyq jáne halyqaralyq baıqaýlardyń laýreaty Qaırat Nurǵazın óner súıer qaýymǵa jańa ánderin tartý etti.
Bir kúnde eki kontsert bergen sazgerdiń «Ásem Býrabaı», «Aman júrshi, aınalaıyn» jáne «Sen áli ǵashyqpysyń» atty jańa ánderiniń tusaýkeseri ótti.
Osy keshtiń qurmetti qonaǵy bolǵan ánshi-kompozıtorlar Marat Omarov, Qaırat Júnisov, Elena Ábdihalyqova, Qurmash Mahan jáne Janat Temirova óz shyǵarmalaryn oryndap, óner keshine án-shashýlaryn arnady.
Belgili ánshiler halyqaralyq «Azııa daýsy» baıqaýynyń laýreaty Manarbek Baıtasov jáne halyqaralyq «Vostochnyı bazar» baıqaýynyń laýreaty Jadyra Arystanova óner kórsetti. Osy keshte Qaırat Nurǵazınniń shákirtteri Anastasııa Pıkýleva, Alǵashbek Kishkenbaev, Serikbolsyn Súleımenov, Alma Ardahanova sazgerdiń ánderin oryndady. Sonymen qatar óner keshi ıesiniń óz uly Arslanbek Qaıratuly án shyrqap, kórermender yqylasyna bólendi.
Kontsert sońynda óner súıer qaýymnyń suraýy boıynsha Qaırat Nurǵazın «Arman jyrym - arýlarym» ánin oryndap berdi. Qazaq qyzdarynyń qadirin arttyrǵan ándi kórermender erekshe tolqynyspen qabyl aldy.
«Ózim bıyl múshel jasqa toldym. Ári el aldynda esep bereıin degen nıetpen kontsert uıymdastyryp, kezinde «Úkili úmit» respýblıkalyq baıqaýynda birge óner kórsetken dostarymdy shaqyrdym. Ózim án álemine baýlyp júrgen shákirtterim de sahnaǵa shyqty. Án keshi oıdaǵydaı ótti»,- dedi ánshi-kompozıtor Qaırat Nurǵazın.
