«Qaırat» matchyn kórip, sodan keıin sahnaǵa shyǵamyn – Kopengagendegi qazaq bıshisi
ALMATY. KAZINFORM — Fýtbol emotsııasy men teatr sahnasy — bir-birine uqsamaıtyn eki álem. Alaıda Kopengagendegi Danııa Koroldigi teatrynda óner kórsetip júrgen qazaq bıshisi Meırambek Nazarǵojaev úshin erteń bul ekeýi bir kúnde túıispek. Ol áýeli trıbýnada «Qaıratqa» jankúıer bolyp, jarty saǵattan keıin sahnada áıgili «Şelkýnchık» spektaklinde Hanzadanyń partııasyn bıleıdi.
Kazinform tilshisi Eýropa elderi teatryndaǵy Qazaqstannyń jalǵyz ókili Meırambek Nazarǵojaevtyń ózimen áńgimelesip, erteńgi eki birdeı mańyzdy oqıǵaǵa daıyndyǵy týraly bildi.
– Meırambek, matchtyń birinshi taımyn stadıonda kórip, sodan keıin teatrǵa asyǵyp, sahnaǵa shyǵý — sırek jaǵdaı. Erteńge daıyndyǵyńyz qalaı?
— Suraǵyńyzǵa kóp raqmet! Osy kúndi asyǵa kúttim. Qazirdiń ózinde túrli sezimdi bastan keshirip jatyrmyn. «Qaırat» – «Kopengagen» matchy men teatrdaǵy spektaklim tuspa-tus kelip qaldy. Áriptesterimniń kóbi jaraqat alyp qalǵandyqtan meniń ornyma eshkim óner de kórsete almaıdy.
Jalpy «Qaırat» Chempıondar lıgasynyń toptyq kezeńine shyqqanda elmen birge qatty qýandym. Sebebi bul — Qazaqstan fýtbol tarıhyndaǵy mańyzdy oqıǵa. Ekinshiden, Almaty oblysynda týsam da, Almatynyń ózinde kóp jyl turdym, bilim aldym. Sol kezde «Qaırattyń» matchtaryna jıi baratynmyn. Ózim bul sporttyń jankúıerimin. Buryn fýtboldy kún saıyn oınaıtynmyn, qazir de arasynda dop teýip turamyn.
Almaty horeografııa ýchılışesinde oqyp júrgen kezimde Almaty oblysy Qaraoı aýylynyń komandasynda oınadym. Sodan keıin aýdandyq komandaǵa shaqyrtý aldym — onda jartylaı qorǵaýshy, shabýyldaýshy boldym. Sol kezde jattyqtyrýshylar Almatyda júrsem de, aýdanǵa kelip oınap berýimdi ótinetin. Ózim resmı Almatyda tirkeýde turǵandyqtan, aýdandyq jarystarda óner kórsete almadym. Sol kezde jattyqtyrýshylarym onyń da aılasyn tapty. Sóıtip, óz inimniń atynan stadıonǵa shyǵyp júrdim. Maqtaý qaǵazdaryn da alyp, fýtbol týraly jazylǵan kitaptarda sýretterim de basyldy.
Ýchılışedegi daıyndyqtan tys ýaqytta ózge bıshilerdi saıabaqtaǵy stadıonǵa ózim jınaıtynmyn. Internatta turǵan soń aıaq kıim tabý qıyn edi. Búkil bólmeni aralap shyǵyp, oınaǵysy keletinderge býtsy, krossovka izdeýmen ýaqytym ótip ketetin. Tipti shaǵyn fýtboldan jarysta qaladaǵy kolledj, ýnıversıtet komandalaryn utyp ketkende kópshiligi «Sender ózi bımen emes, fýtbolmen aınalysýlaryń kerek qoı» dep ázildeıtin. Qazir, ókinishke qaraı, jumys kestem tyǵyz bolǵandyqtan, sırek oınaımyn.
Al «Qaırat» — «Kopengagen» matchyn asyǵa kútip júrmin. Instagram-paraqshamda da Chempıondar lıgasynyń jerebesi tartylmaı turyp «Kopengagen» men «Qaırat» bir-birine qarsy oınasa qalaı bolar eken?» dep jazǵanmyn. Keıinirek aıtqanym dál keldi. Osydan keıingi bar ýaıymym — match pen teatrdaǵy spektakl ýaqyty tuspa-tus kelip qalmasa eken degen oı boldy. Bıyl jazda Qazaqstanǵa qonaqqa baryp, Almatyda óner kórsetken Danııa Koroldigi teatrynyń ártisteri de «Bos bolsaq, mindetti túrde senimen birge baramyz» dedi. Alaıda, ókinishke qaraı, bul qorqynyshym da dál keldi — match kúni teatrda spektakl de ótedi.
Kopengagen shaǵyn ǵana qala. Stadıonnyń ózi qalanyń ortalyǵynda ornalasqan. Fýtbol jankúıeri kóp. Mundaǵy úlken-kishiniń bári jergilikti komanda qaı kúni, kimmen oınaıtynyn bilip otyrady. Almaty — ózim ósken, al Kopengagen — qazir qyzmet etip, ómir súrip júrgen qalam. Biraq erteń «Qaıratty» qoldap, jankúıer bolatynym sózsiz.
– Basqa balet ártisteri jaraqat alyp qalǵandyqtan, sizdi eshkim almastyra almaıtynyn aıttyńyz. Soǵan qaramastan, matchqa baryp, «Qaıratqa» qoldaý kórsetkeli otyrsyz. Bul sahna aldyndaǵy rejımińizge áser etpeı me?
— Qazir Danııa Koroldigi teatrynda dástúr boıynsha «Şelkýnchık» maýsymy ashyldy. Spektaklder kún saıyn qoıylyp jatyr. Alaıda ózim bul qoıylymnyń ekinshi bóliminde Hanzadanyń partııasyn bıleımin. Osy sebepti matchty jartylaı bolsa da kórýge múmkindik týyp tur. Alaıda birinshi taım bite salysymen, birden teatrǵa jetýim kerek. Kúndiz mindetti túrde spektaklge daıyndalamyz, sol kezde sahnaǵa kıip shyǵatyn kostıýmderimdi daıyndap ketemin. Tek stadıonnan teatrǵa jetip alǵan soń denemdi qyzdyryp, boıaýymdy jaǵyp, sahnaǵa shyǵyp ketýim kerek.
Bul spektakl aldyndaǵy rejımime kesirin tıgizetini ras. Biraq «Qaırat» Kopengagenge jylda kele bermeıdi. Bul — tarıhı match, sol sebepti qapy qala almaımyn. Birinshi taımdy stadıonda tamashalap, ekinshisin teatrǵa jetip alyp, denemdi qyzdyryp jatqanda kóremin.
– Oıynǵa jalǵyz barasyz ba, álde Kopengagendegi qazaqtarmen nemese áriptesterińizben birge tamashalaý josparyńyz bar ma?
— Matchqa kóp adam jınalady. Danııanyń shet-shetinde turatyndar aǵylyp keledi. «Danııadaǵy qazaqtar» degen tobymyz bar. Ondaǵylardyń bári osy matchty asyǵa kútip otyr. Oıynǵa deıin jınalyp, kezdesý josparymyz da bar. Matchtan keıin de otyrys bolady. Sondaı-aq Skandınavııa, tipti Eýropanyń basqa elderindegi qazaqtar da Kopengagenge jetýi múmkin. Qazaqstannyń Shvetsııa jáne Danııa Koroldikterindegi tótenshe jáne ókiletti elshisi Oljas Súleımenov te keledi. Sondyqtan oıyndy tamashalaýǵa jalǵyz baramyn dep aıta almaımyn. Sondaı-aq ózime ózbekstandyq azamattar da osy matchta bizdiń komandaǵa qoldaý kórsetinin jazdy. Osynyń arqasynda «Qaırat» ózin Almatyda oınap jatqandaı sezinedi úmittenemin.
– Teatrda sizdi kútip otyrǵan áriptesterińizge matchqa baryp keletinińizdi aıtqanda olardyń reaktsııasy qandaı boldy?
— Áriptesterimniń bári men úshin qýanyp otyr. Teatrda túrli ult ókili qyzmet etetindikten, biz ylǵı bir-birimizdi qoldap júremiz. Olardyń bar ýaıymy — meniń teatrǵa keshikpeı jetýim.
– Stadıonnan teatrǵa deıingi marshrýtyńyz daıyn ba?
— Iá, stadıon men teatr arasyndaǵy joldyń uzaqtyǵy shamamen jarty saǵat. Kopengagenniń ınfraqurylymy velosıped aıdaıtyndar úshin óte qolaıly. Al kólikke, metroǵa mingende túrli fors-major oqıǵa nemese keptelis bolyp qalýy múmkin. Sol sebepti osyndaı qaýiptiń aldyn alý úshin jolǵa velosıpedpen shyǵýdy josparlap otyrmyn. Ózim velıkti tez aıdaımyn. Tek ony stadıon mańynda yńǵaıly jerge qoıýym kerek. Velosıpedti tańdaǵanymnyń taǵy bir sebebi — spektaklge deıin jol-jónekeı denemdi qyzdyryp jetemin.
– «Qaıratty» qalaı qoldamaqshysyz? Ádette jankúıerler moıynoraǵysh, jalaý ustap barady.
— Ókinishke qaraı, ózimde munyń eshqaısy joq. Almatyda júrgenimde komandanyń fırmalyq dúkenine soqqanmyn, biraq sol kúni jabyq turdy.
Match kúni betime elimizdiń týyn boıaýmen salyp alamyn degen oı kelgen. Alaıda teatrǵa jetkende ony jýyp-shaıýym kerek, al bul ýaqytty alady. Sol sebepti «Qazaqstan» degen jazýy bar sporttyq kıimimdi kıip baramyn dep sheshtim.
Al negizi ózimizdiń jankúıerler tegis daıyndalyp keledi dep senemin. Munda turatyn ár qazaqtyń úıine qonaqqa bara qalsańyz, Qazaqstannyń týy ilinip turady. Sondaı-aq oıý-órnektermen beınelegen túrli ydys-aıaq pen basqa da buıymdardy kózińiz shalady. Dombyra da bar. Qanshama jyldan beri osynda turyp jatsa da, eldi umytpaǵan. Qazaqshasy da tap-taza. Uıymshyl. Naýryzda da jyl saıyn toılaıdy.
– «Qaırat» birinshi taımda gol soǵyp ketse, bul sahnadaǵy bıińizge qalaı áser eter edi?
— Negizi ártistiń sahnadaǵy ónerine teatrǵa qandaı kóńil-kúımen kelgeni áser etedi. Eger ol áldenege alańdap tursa, bul birden baıqalyp qalady. Kórermendi de aldaý múmkin emes.
«Qaırat» birinshi taımda gol salsa, teatrǵa keremet kóńil-kúımen jetetinim de, bul sol kúngi ónerime shabyt beretini de sózsiz. Qansha jyldan beri bılep júrsem de, mundaı oqıǵa alǵash ret bolǵaly tur.
Ózim matchtan kóp úmit kútemin. «Qaıratqa» «Kopengagen» asa myqty qarsylas dep aıta almaımyn. Óıtkeni almatylyq klýb odan da myqty komandalarmen teń dárejede oınady, jaqsy óner kórsetti. Tek batyldyq tanytyp, shabýyldar jasasa jetkilikti. Kopengagende birneshe kún buryn qar jaýǵan, qazir erip ketti, sál yzǵar bar. «Qaırat» oıynshylary soǵan qaramastan, oıdaǵydaı óner kórsetedi degen úmittemin.
Eske salaıyq, buǵan deıin almatylyq «Qaırat» Danııa astanasyna baryp, Chempıondar lıgasynyń jalpy kezeńiniń besinshi týry aıasynda «Kopengagenge» qarsy ótetin match aldyndaǵy alǵashqy jattyǵýyn ótkizgenin jazǵanbyz.
Kezdesý 26 qarasha kúni «Parken» stadıonynda ótedi. Oıyn Qazaqstan ýaqyty boıynsha 22:45-te bastalady.