Qaırat Mámı ólim jazasynan bas tartýǵa qatysty jumystarǵa pikir bildirdi
«Konstıtýtsııalyq Keńestiń sheshimderin oryndaý protsesi jalǵasýda. Respýblıka Prezıdenti málimdegen jáne júrgizip otyrǵan qoǵam men memleketti odan ári demokratııalandyrý baǵyty konstıtýtsııalyq baqylaý organynyń rólin arttyrýdy jáne Konstıtýtsııalyq Keńes týraly zańnamany jetildirýdi talap etedi.
Azamattardyń konstıtýtsııalyq baqylaýǵa qol jetkizýin keńeıtý qajet.
Bul baǵytta sottardyń Konstıtýtsııalyq Keńeske ótinish jasaý tártibin, taraptardyń qoldanystaǵy zańnyń konstıtýtsııalyǵyn tekserý týraly ótinishterin qaraý tártibin ońtaılandyrý ózekti. Eýropa Keńesiniń Venetsııa komıssııasy bul máseleler boıynsha oń qorytyndysyn berdi», - dedi ol QR Konstıtýtsııalyq Keńesiniń Respýblıkadaǵy konstıtýtsııalyq zańdylyqtyń jaı-kúıi týraly jyl saıynǵy joldaýyn jaıarlaý kezinde.
Q. Mámıdiń sózine qaraǵanda, Qazaqstan Respýblıkasynda memlekettik basqarýdy damytýdyń 2030 jylǵa deıingi tujyrymdamasyn júzege asyrý aıasynda jekelegen memlekettik fýnktsııalardy qaıta qaraý jáne olardyń aıasynda kórsetiletin memlekettik qyzmetterdi básekeles ortaǵa berý jónindegi jumys jalǵastyrylatyn bolady. Konstıtýtsııalyq Keńes «memlekettik fýnktsııa» jáne «memlekettik kórsetiletin qyzmetter» uǵymdarynyń teń maǵynaly emestigin atap ótken bolatyn. Bul uǵymdardy bir-birimen teń túsiný azamattyq-quqyqtyq ınstıtýttardyń jarııa-quqyqtyq ınstıtýttarmen aralasyp ketýine ákep soqtyrýy múmkin. Sondyqtan osy baǵyttaǵy jumys osy konstıtýtsııalyq talaptar eskerile otyryp, júıeli ári turaqty túrde júrgizilýge tıis.
«Qazaqstannyń basty maqsattarynyń biri adam quqyqtaryn jan-jaqty qorǵaý bolyp qalýda. Ótken jyldyń sońynda Qazaqstan Respýblıkasy Prezıdentiniń ótinishi boıynsha Konstıtýtsııalyq Keńes Respýblıka Konstıtýtsııasynyń ólim jazasyn qoldaný máselelerin reglamentteıtin erejelerine resmı túsindirme berdi. Keńes atap ótkendeı, Konstıtýtsııaǵa jáne jalpyǵa birdeı tanylǵan halyqaralyq aktilerge sáıkes, ómir súrý quqyǵy demokratııalyq qoǵamnyń negizgi qundylyǵy bolyp sanalady. Negizgi Zań ólim jazasyn belgileý, olardyń sheńberin qysqartý nemese odan bas tartý týraly máseleni Parlamenttiń quzyryna qaldyrady. Osy quqyqtyq ustanymdardy eskere otyryp, tıisti zańdardy ózderińiz ratıfıkatsııalaǵan Azamattyq jáne saıası quqyqtar týraly halyqaralyq paktiniń Ekinshi Fakýltatıvtik hattamasynyń erejelerimen úılestirý jónindegi jumysty aıaqtaý kerek. Sonymen qatar, quqyq qorǵaý júıesin jańǵyrtý jóninde júrgizilip jatqan jumys aıasynda qylmystyq protseske qatysýshylar quqyqtarynyń konstıtýtsııalyq kepildikterin nyǵaıtý boıynsha baǵytty jalǵastyrý kerek», - dedi Konstıtýtsııalyq Keńestiń tóraǵasy.
Budan bóleýk Q. Mámı múgedekter quqyqtaryn qorǵaý, olarǵa teń múmkindikterdi qamtamasyz etý maqsatynda halyqaralyq praktıkada qalyptasqan normalar men standarttar keshenin barynsha paıdalanǵan jón ekenin atap ótti.
