Qaırat Mámı oblystyq sot tóraǵalarynyń kemshilikterin tizip shyqty
ASTANA. QazAqparat - Oblystyq sottar Joǵarǵy sotqa negizsiz jáne logıkalyq tujyrymsyz usynystar engizedi. Bul týraly búgin 2017 jyldyń 1 jartyjyldyǵynda sot tóreligin júzege asyrý qorytyndylaryna arnalǵan respýblıka sýdıalarynyń keńeıtilgen otyrysynda QR Joǵarǵy sotynyń tóraǵasy Qaırat Mámı aıtty, dep habarlaıdy QazAqparat.
«Oryndaýshylyq tártiptiń deńgeıi de tómen qalyp otyr. Joǵary sottyń hattamalyq jáne josparly tapsyrmalary da sapasyz oryndalady. Tóraǵalardan kelip túsetin aqparattardyń basym bóligi naqty emes. Usynystar eshqandaı negizsiz jáne logıkalyq tujyrymsyz engiziledi. Búginde Jaqsylyq Rzabekulynyń (Mańǵystaý oblystyq sotynyń tóraǵasy) bizge jetkizýge tyrysqan oılarynyń jartysyn osynda otyrǵandar túsingen de joq. Mundaı hattar bizge jazbasha da kelip jatady», - dedi Joǵarǵy sot tóraǵasy.
Sonymen qatar ol oblystyq sottardan tóraǵanyń qoly qoıylǵan bir aqparattyń san qaıtalanyp kelip jatatyndyǵyn da synǵa aldy.
«Sizder qol qoıýǵa ákelgen qaǵazdy múldem oqımaıtyndaı sezim qalady nemese muny qasaqana jasaısyzdar. Bul jumystyń mazmunyna jeke jaýapkershilikti kúsheıtý qajet. Ózgelerge qaraǵanda mundaı eskertýler Almaty qalasynyń, Batys Qazaqstan men Soltústik Qazaqstan oblystarynyń sottaryna óte kóp», - dedi Qaırat Mámı.
