Qaırat Mámı qazaqsha bilmeıtin Pavlodar oblysynyń sýdıalaryna shúılikti
"Pavlodar oblysynyń aýyldary men Aqsý qalasynda turatyn bir top azamat Joǵarǵy Sot pen ortalyq memlekettik organdarǵa aryz-shaǵymdardy úıip tastady. Joǵarǵy Sottyń ózine 20-ǵa tarta shaǵym keldi. Sonyń ishinde Prezıdent Ákimshiligine kelgen aryzdar da bar. Memleket Basshysynyń atyna birneshe ret aryzdanyp kelgen. Basty sebep Mútkenov aýylyndaǵy qarııalardyń daý-damaıy bolyp otyr", - dedi Mámı.
Másele olardyń orys tilin túsinbeıtindiginde, al qazaq tilin biletin sýdıa oblysta joq bolyp shyqqan.
"Aýdanda eki sýdıa bar, ekeýi de orys tildi, qazaqshalary saýatsyz. Oblystyq sot tóraǵasy Smaǵulov jazý bile ma, oqı alady ma? Bar ma ózi? Tiri ma ol? degen xattar legi taýsylar emes", - dedi ol turǵyndardyń xatyn keltirip.
Osydan soń, Joǵarǵy Sot tóraǵasy óńirdegi sot tóraǵalaryna xalyqpen tyǵyz jumys jasaýdy eskertti.
"Jeke qabyldaý ótkizýge bolmaı ma? Aýyldyń 70-tegi qarttarymen osy shıelenisti sheshý múmkin emes pe? Ákimdiktermen, máslıxattarmen, Qazaqstan xalqy Assambleıasymen memorandým ne úshin jasaldy? Medıatsııany ne úshin engizdik? Máseleni jeke sheshýge bolmasa, ákimdiktermen birge kúsh biriktirý qajet. Jergilikti aqsaqaldardy kóterińizder. Ózderiń qazaqsha sóıleı almasańdar, sizderdiń qazaq tilin biletin orynbasarlaryń, qol astyndaǵy sýdıalaryń bar. Bul jumys sizderde oryndalmaǵan. Endi aldymyzda turyp, bizden aqtalmaqsyńdar", - dep shúılikti Q. Mámı.
Onyń aıtýynsha, xalyqtyń aryzdary oblystyq sotqa 2 jeltoqsanda joldanǵan. Alaıda sodan beri eshqandaı shara qoldanylmaǵan.
"Sizder halyq aryzy túgili, Joǵarǵy Sottyń xattaryn oqymaıtyn shyǵarsyzdar. Jumysqa barasyzdar ma ózi? Halyq ózderi (kinálini - red.) jazaǵa tartqanyn kútip otyrsyzdar ma? Barlyq elge taǵy ataǵymyz shyǵady ǵoı, sol kezde ǵana qozǵalatyn shyǵarmyz. Bul kıkiljińdi tolyqtaı sheshýge 10 kún beremin", - dep eskertti Joǵarǵy Sot tóraǵasy.
