Qaırat Mámı depýtattyq korpýsty jańa jylǵa júktelip otyrǵan mindettermen tanystyrdy
ASTANA. 5 qańtar. QazAqparat - Búgin QR Parlamenti Senatynyń Bıýro otyrysy ótti. Bul týraly Senattyń baspasóz qyzmetinen habarlady.
Otyrysty ashqan Senat tóraǵasy Qaırat Mámı, depýtattyq korpýstyń aldynda jańa jylda turǵan mindetterdi atap ótti.
- «Parlament Senaty Memleket basshysynyń bastamalaryn zańnamalyq turǵyda sapaly qamtamasyz etý, memleket saıasatynyń basym baǵyttaryn quqyqtyq turǵyda qoldaý boıynsha jumys isteýi tıis», - dedi Q.Mámı. Qazir Senattyń qaramaǵynda 25 zań jobasy bar.
Q.Mámı sondaı-aq, bıylǵy naýryz aıynda Almatyda TMD Parlamentaralyq Assambleıasynyń mereıtoılyq otyrysy, al mamyrda Astana qalasynda Álemdik jáne dástúrli dinder kóshbasshylarynyń IV sezi ótetindigin habardar etti.
Otyrys barysynda QR Úkimetinen kelip túsken jáne Parlament Májilisi Apparatynan qaıta suratyp alynǵan zań jobalary Senattyń turaqty komıtetterine bólinip berildi.
Otyrysta «Ulttyq ál-aýqat qory týraly» jáne «Qazaqstan Respýblıkasynyń keıbir zańnamalyq aktilerine Ulttyq ál-aýqat qory qyzmetiniń máseleleri boıynsha ózgerister men tolyqtyrýlar engizý týraly» zań jobalary boıynsha Qarjy jáne bıýdjet komıteti bas komıtet bolyp belgilendi.
Osy komıtet «Investıtsııalar týraly» 2003 jylǵy 8 qańtardaǵy Qazaqstan Respýblıkasynyń zańyna ózgerister men tolyqtyrýlar engizý týraly» jáne «Qylmystyq jolmen alynǵan kiristerdi zańdastyrýǵa jáne lańkestikti qarjylandyrýǵa qarsy is-qımyl jónindegi Eýrazııalyq top týraly kelisimdi ratıfıkatsııalaý týraly» zań jobalary boıynsha bas komıtet bolyp belgilendi.
Qazaqstan Respýblıkasy men Reseı Federatsııasynyń arasyndaǵy Saýda ókildikteriniń bólimshelerin ashý jáne Saýda ókildikterin ózara qurý týraly úkimetaralyq kelisimderdi ratıfıkatsııalaý týraly zań jobalary boıynsha bas komıtet bolyp - Ekonomıkalyq damý jáne kásipkerlik komıteti aıqyndaldy.
Halyqaralyq qatynastar, qorǵanys jáne qaýipsizdik komıteti «Qazaqstan Respýblıkasynyń keıbir zańnamalyq aktilerine shıfrlyq baılanys máseleleri boıynsha ózgerister men tolyqtyrýlar engizý týraly» zań jobasy boıynsha bas komıtet retinde belgilendi.
Al «Qazaqstan Respýblıkasy men Koreıa Repýblıkasy arasyndaǵy Ustap berý týraly shartty ratıfıkatsııalaý týraly» zań jobasy boıynsha Konstıtýtsııalyq zańnama, sot júıesi jáne quqyq qorǵaý organdary komıteti - bas komıtet boldy.
Bıýroda sondaı-aq, 2012 jylǵy 11 qańtarda bolatyn Senattyń kezekti otyrysynyń kún tártibi boıynsha usynystar qaraldy.
Otyrysta Qazaqstan Amerıka Qurama Shtattarynyń arasyndaǵy Járdem kórsetýdi jeńildetý jónindegi yntymaqtastyqqa qatysty úkimetaralyq kelisimdi ratıfıkatsııalaý týraly zań jobasy qaralady.
Depýtattar talqysyna «Qazaqstan Respýblıkasynyń arnaýly memlekettik organdary týraly» jáne birinshi oqylymda «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń arnaýly memlekettik organdary máseleleri boıynsha ózgerister men tolyqtyrýlar engizý týraly» zań jobalary da usynylatyn boldy.
«Ulttyq ál-aýqat qory týraly» jáne qoldanystaǵy zańnamaǵa Ulttyq ál-aýqat qory qyzmetiniń máseleleri boıynsha ózgerister men tolyqtyrýlar engizý týraly zań jobasyn birinshi oqylymda qaraý kózdelip otyr.
Odan basqa keıbir zańnamalyq aktilerine elektr energetıkasy, tabıǵı monopolııalar men retteletin naryq sýbektileriniń ınvestıtsııalyq qyzmeti, bıýdjet protsesine qatysýshylardyń, bıýdjet qarajatyn alýshylardyń jaýapkershiligin kúsheıtý jáne bıýdjettik rásimderdiń tıimdiligin arttyrý, memlekettik monopolııa boıynsha ózgerister men tolyqtyrýlar engizý týraly zań jobalary birinshi oqylymda qaralatyn boldy.
Sondaı-aq Qazaqstan Respýblıkasynyń Eńbek kodeksine ózgerister men tolyqtyrýlar engizý týraly zań jobasyn birinshi oqylymda qaraý josparlandy.
Odan basqa Parlament Senatynyń depýtattaryn halyqaralyq parlamenttik uıymdarǵa jáne Parlament Senatynyń shet memleketter parlamentterimen yntymaqtastyq toptaryna jiberý jónindegi usynystar da qaraldy.
