Qaırat Mámı Belarýs prezıdenti Lýkashenkonyń qabyldaýynda boldy
Kezdesýde QR Konstıtýtsııalyq Keńesiniń Tóraǵasy Qaırat Mámı Belarýs kóshbasshysyn quttyqtaı otyryp, 1994 jyly Belarýs Respýblıkasynyń qoldanystaǵy Konstıtýtsııasy qabyldaǵanyn, ol keń aýqymdy qaıta qurý úshin quqyqtyq negiz qalaǵanyn aıtty.
«Elderimiz arasynda jemisti yntymaqtastyq ornady. Oǵan kóp jaǵdaıda memleket basshylarynyń senimdi jáne dostyq qarym-qatynasy yqpal etedi. Keshe ǵana biz Eýrazııalyq ekonomıkalyq odaq týraly shartqa qol qoıýdyń bes jyldyǵyn atap óttik, ol - bizdiń elderimizdiń tıimdi ıntegratsııasynyń jarqyn úlgisi. Qazaqstan Respýblıkasynyń Tuńǵysh Prezıdenti Nursultan Nazarbaevtyń osy ıdeıasyn júzege asyrýdaǵy zor eńbek Sizge de tıesili», - dep qorytyndylady Qaırat Mámı.
Sol kúni Qazaqstannyń Konstıtýtsııalyq keńesi tóraǵasynyń tóraǵalyq etýimen Jańa demokratııa elderi konstıtýtsııalyq baqylaý organdary konferentsııasynyń otyrysy ótti. Oǵan sondaı-aq Armenııa, Belarýs, Ázerbaıjan, Qyrǵyzstan jáne Reseı konstıtýtsııalyq ádilet organdarynyń ókilderi qatysty.
Arnaıy qonaq retinde Venetsıandyq komıssııanyń birinshi vıtse-prezıdenti Herdıs Torgeırsdottır hanym qatysty.
Іs-sharany asha otyryp, konferentsııa tóraǵasy Qaırat Mámı 22 jyldyń ishinde bizdiń uıym óńirlik qaýymdastyq retinde qalyptasty, dep atap ótti. Ol onyń músheleri arasyndaǵy yntymaqtastyqty tereńdetýge yqpal etedi jáne bizge júktelgen mıssııany iske asyrýǵa baılanysty jalpy máselelerdi talqylaýǵa múmkindik beredi.
Uıym músheleri Jańa demokratııa elderiniń konstıtýtsııalyq baqylaý organdary konferentsııasynyń ataýyn Konstıtýtsııalyq baqylaý organdarynyń eýrazııalyq qaýymdastyǵy dep ózgertý týraly sheshim qabyldady. Ony ereksheleıtin element retinde qaýymdastyqtyń jańa atrıbýttary - logotıp jáne týy bekitildi.
Sonymen qatar, qaýymdastyqqa qatysýshylar 2020 jyly Aljırde ótetin Konstıtýtsııalyq sot tóreligi boıynsha dúnıejúzilik konferentsııanyń 5-shi Kongresin uıymdastyrý máselelerin talqylady. Osy óńirlik qurylymnyń atynan moderatorlar, negizgi baıandamashylar, qosymsha baıandamashylar jáne qorytyndylaýshy spıkerler pozıtsııasyna kandıdatýralar usynyldy. Taraptar sondaı-aq dúnıejúzilik kongress sheńberinde qaýymdastyq otyrysyn ótkizý týraly sheshim qabyldady. Sonymen qatar, delegatsııa basshylary bir-birin óz elderinde bolǵan is-sharalar men odan ári yntymaqtastyq josparlary týraly habardar etti.
Qaırat Mámı Belarýs Respýblıkasy Konstıtýtsııalyq Sotynyń Tóraǵasy P. Mıklashevıchke osy kezdesýdi uıymdastyrýǵa múmkindik bergeni úshin alǵysyn bildirdi.
