Qaırat Mámı Azııa konstıtýtsııalyq sottary qaýymdastyǵyn basqardy

NUR-SULTAN. QazAqparat – QR Konstıtýtsııalyq keńesiniń tóraǵasy Q. Mámı 2019 jylǵy 2-5 qarasha aralyǵynda Indonezııada ótip jatqan Azııa elderiniń konstıtýtsııalyq baqylaý organdarynyń kezdesýine jáne basqa da is-sharalarǵa qatysýda, dep habarlaıdy QazAqparat Konstıtýtsııalyq keńestiń baspasóz qyzmetine silteme jasap.

«Birinshi kúni Q. Mámı Indonezııa Respýblıkasy Konstıtýtsııalyq sotynyń tóraǵasy Anvar Ýsman myrzamen ekijaqty kezdesý ótkizdi. Taraptar konstıtýtsııalyq ádilet organdarynyń fýnktsııalaryn iske asyrý máseleleri boıynsha pikir almasty. Kelissózder qorytyndysy boıynsha Qazaqstan Konstıtýtsııalyq keńesi men Indonezııa Konstıtýtsııalyq soty arasynda yntymaqtastyq týraly memorandýmǵa qol qoıyldy. Ol Konstıtýtsııa ústemdigin qamtamasyz etý salasyndaǵy eki organnyń ózara is-qımylyn jańa deńgeıge kóterýge baǵyttalǵan», delingen habarlamada.

3 qarashada Azııa konstıtýtsııalyq sottary jáne balama ınstıtýttar qaýymdastyǵynyń (AASS) músheleri komıtetiniń otyrysy ótti. Uıymnyń quramyna jańa músheler – Úndistannyń jáne Maldıv Respýblıkasynyń Joǵarǵy sottary qabyldandy.

QR Konstıtýtsııalyq keńesi aldaǵy eki jylǵa Azııa konstıtýtsııalyq sottary men balama ınstıtýttar qaýymdastyǵynyń tóraǵasy bolyp biraýyzdan saılandy. Otyrysta kelesi jyly Nur-Sultan qalasynda qaýymdastyqtyń 4-shi kongresin ótkizý máseleleri de talqylandy.

4 qarashada Qazaqstan delegatsııasynyń basshysy Indonezııa Konstıtýtsııalyq sotynyń «Konstıtýtsııalyq sot jáne áleýmettik-ekonomıkalyq quqyqtardy qorǵaý» taqyrybyndaǵy 3-shi halyqaralyq sımpozıýmynyń ashylý rásimine qatysty. Forým qatysýshylaryna Indonezııanyń Vıtse-Prezıdenti Maarýf Amın myrza quttyqtaý sóz sóıledi.

Paneldik sessııalarda Qazaqstan Konstıtýtsııalyq keńesiniń tóraǵasy baıandama jasap, halyqaralyq zań jurtshylyǵyn keńestiń azamattardyń áleýmettik-ekonomıkalyq quqyqtaryn qorǵaý máselelerine qatysty sheshimderimen tanystyrdy.

Q. Mámı óz sózinde atap ótkendeı, Konstıtýtsııanyń birinshi babyna sáıkes Qazaqstan Respýblıkasy ózin áleýmettik memleket retinde ornyqtyrady. Bul norma Qazaqstan óz azamattarynyń laıyqty ómir súrýi jáne jeke tulǵanyń erkin damýy úshin memlekettiń múmkindikterine barabar jaǵdaı jasaý mindetin ózine alatyn memleket retinde damýǵa nıetti ekenin bildiredi. Áleýmettik jáne ekonomıkalyq quqyqtardy qamtamasyz etý memlekettiń turaqty damýy jáne qoǵamdyq senim úshin úlken mańyzǵa ıe.