Qaırat Mámı: «Atameken» UKP basqarýdyń, bıznes qaýymdastyqpen keri baılanystyń qýatty júıesine ıe

ASTANA. QazAqparat - Búgin Joǵarǵy Sot «Atameken» Ulttyq kásipkerler palatasymen birlesip, bıznestiń quqyqtary men zańdy múddelerin sotta qorǵaýdyń tıimdiligin arttyrý maqsatynda birlesken is-sharalar josparyna qol qoıdy, dep habarlaıdy QazAqparat.

«Mundaı Jol kartasyn ázirleı otyryp, biz aldymyzǵa UKP músheleriniń ǵana emes, barlyq kásipkerlerdiń múddelerin senimdi sot qorǵaýymen qamtamasyz etýdi maqsat etip qoıdyq. Qazirgi tańda «Atameken» ulttyq kásipkerler palatasy basqarýdyń jáne bıznes qaýymdastyqpen keri baılanystyń qýatty júıesi, sondaı-aq salmaqty saraptamalyq-taldamalyq baza quryldy. Eger de búgin kóteriletin máseleler sapaly sheshimin tabar bolsa, qabyldanatyn sharalar sotta quqyǵyn qorǵaýdy qajet etetinder úshin paıdaly bolmaq», - dedi forýmda Joǵarǵy Sot tóraǵasy.   

Óz kezeginde, «Atameken» basqarma tóraǵasynyń orynbasary Rýstam Júrsinov «keıde sheneýnikter memlekettiń múddesin bıýdjettiń kiris bóligin toltyrýmen baılanystyratyndyǵyn» atap ótti.

Statıstıka boıynsha sotta qaralatyn isterdiń 20-30%-y ǵana bıznes paıdasyna sheshiledi. «Atameken» ókilderi kásipkerlerdiń múddeleri bıýdjet múddesimen bir qatarda turýy qajettigin alǵa tartady. Ulttyq palata Joǵary Sotpen birlesip oryn alatyn daýlardyń sebebi men týyndaý jaǵdaıyn anyqtaý maqsatynda salyq jáne kedendik máseleler, satyp alý salasy, ekologııa, bankrottyq jáne ońaltý, ákimdiktermen jáne kvazımemlekettik kompanııalarmen bolatyn daýlarǵa qatysty jeti salaǵa taldaý jasaýdy josparlap otyr.

Forým sońynda Bıznesti sotta qorǵaý boıynsha birlesken jumys jol kartasyna qol qoıý rásimi ótti. Qujatqa Joǵarǵy Sot janyndaǵy Sottardyń qyzmetin qamtamasyz etý departamentiniń basshysy Nurserik Sháripov pen «Atameken» UKP basqarma tóraǵasy Abylaı Myrzahmetov qol qoıdy.

Jol kartasy aıasynda sottarda sot tóreliginiń negizgi prıntsıpteri: jaryspalylyq pen taraptardyń teńdigin saqtaý máselesi saraptamalyq taldaýdan ótedi.

Joǵary Sot «Atameken» UKP-men birlesip, bıznes-qoǵamdastyq tarapynan sottarǵa degen senim deńgeıin anyqtaý maqsatynda qoǵamdyq kózqarasqa zertteý júrgizedi. Bıznestegi ózara qarym-qatynastyń quqyqtyq mádenıetin arttyrý boıynsha sharalar qabyldaý kózdelip otyr. Atap aıtqanda, mámilelerdi quqyqtyq súıemeldeý, sharttyq mindettemelerdi buljytpaı oryndaýdy qamtamasyz etý, sondaı-aq daýlardy sotqa deıingi retteý tásilderin qoldaný kúsheıtiletin bolady.

Іs-shara sońynda forýmǵa qatysýshylary Joǵary Sottyń Ahýaldyq ortalyǵynyń múmkindikterimen tanysty.