Qaırat Mámı Ál-Farabı atyndaǵy QazUÝ medalimen marapattaldy

ASTANA. QazAqparat -  Joǵarǵy Sot Tóraǵasy, zań ǵylymdarynyń doktory, professor, 1981 jyly QazMÝ zań fakýltetiniń túlegi Qaırat Mámı Ál-Farabı atyndaǵy Qazaq ulttyq ýnıversıtetiniń № 002 «Asa  kórnekti túlek» medalimen marapattaldy, dep habarlaıdy QR Joǵarǵy Sotynyń baspasóz qyzmeti.

Marapatty joǵary oqý ornynyń rektory Ǵalym Mutanov «Qylmystyq is óndirisiniń tıimdi júrgizilýi - qazirgi quqyq qorǵaý júıesi damýynyń basym baǵyty» taqyrybynda ótken «dóńgelek ústel» jumysy barysynda tapsyrdy. Ǵ.Mutanov óz sózinde respýblıka joǵary sot organy tóraǵasynyń ýnıversıtet damýy men QazUÝ túlekteri qaýymdastyǵynyń prezıdenti retindegi aıryqsha úlesin atap ótti.

Q.Mámı ýnıversıtettiń kórnekti túlek dep tanylǵan ekinshi túlek bolyp tabyldy. 2016 jyly № 001 «Asa kórnekti túlek» medalimen aqyn, kórnekti qoǵamdyq-saıası qaıratker, QazMÝ túlegi Oljas Súleımenov marapattalǵan bolatyn.