Qaırat Lama Sharıf óziniń aılyq tabysy men múlkin jarııa etti
ASTANA. 15 mamyr. QazAqparat - Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Din isteri agenttiginiń tóraǵasy Qaırat Lama Sharıf óziniń aılyq tabysy men múlki jaıynda aıtyp berdi.
Onyń sózine qaraǵanda, búginde Halyq bankiniń zeınetaqy jınaqtaýshy qoryndaǵy jalpy zeınetaqylyq jınaǵynyń somasy 5 mln. teńgeni qurap otyr.
«20 jyldyq memlekettik qyzmetimdegi jumys ótiline oraı meniń agenttik tóraǵasy retindegi mansaptyq aılyq jalaqym 607 319 teńgeni quraıdy. Bul somanyń 10 paıyzy nemese 60 732 teńgesi mindetti zeınetaqylyq jarna esebinde, sondaı-aq 52 793 teńge derbes tabys salyǵy retinde ustalyp qalady. Osylaısha, qolyma tıetin taza aılyq jalaqym 493 794 teńgeni quraıdy»,-dedi agenttik basshysy.
Belgili bolǵandaı, onyń jekemenshiginde eki úsh bólmeli úıi bar eken. Bireýi - Astanada, al ekinshisi Almaty qalasynda (ony 1989 jyly turǵyn úı kooperatıviniń qatysýshysy retinde ıelengen). Sonymen qatar 2010 jyly shyǵarylǵan «Toıota Prado» jeńil avtokóligi bar.
«Ózim jáne otbasymnyń músheleri, týǵan tórt aǵam men olardyń balalary jeke kásipkerlikpen aınalyspaıdy. Meniń jaqyn týystarym Pavlodar oblysynyń aýyldyq jerlerinde turady»,-dep naqtylap ótti ol.
