Qaırat Qudaıbergendi qamaýǵa alý merzimi taǵy uzartyldy

ALMATY. QazAqparat – Almaty qalalyq máslıhatynyń burynǵy depýtaty Qaırat Qudaıbergendi qamaý merzimi taǵy eki aıǵa uzartyldy, dep habarlaıdy QazAqparat tilshisi.

Bul týraly Almaty qalalyq sotynyń baspasóz qyzmeti málim etti.

«16 tamyz kúni Almaty qalalyq tergeý sotynyń qaýlysymen kúdiktini qamaýda ustaý merzimi eki aıǵa uzartyldy. Qamaý merzimi – 2022 jyldyń 21 qazanyna deıin», - dep habarlady Almaty sotynyń baspasóz qyzmetinen.

Buǵan deıin kúdiktini qamaý merzimi bir aıǵa uzartylǵan bolatyn.

Aıta keteıik, 24 sáýir kúni sot qaýlysymen tergeý organdarynyń ótinishi qanaǵattandyrylyp, Qaırat Qudaıbergenge qatysty áreketti saralaý týraly qaýly shyǵarylǵanǵa deıin ony 30 táýlik merzimge kúzetpen ustaý túrindegi bultartpaý sharasyna sanktsııa berilgen bolatyn.

Eske salsaq, Qaırat Qudaıbergenniń ustalǵany týraly aqparat 22 sáýirde paıda bolǵan edi. Keıin QR Bas prokýratýrasy Almaty qalasy máslıhatynyń depýtaty Qaırat Qudaıbergen qańtar oqıǵasynyń isi boıynsha ustalǵanyn rastady. Qaırat Qudaıbergen Dıkıı Armanmen birge adam jınaýdy uıymdastyrǵan dep habarlandy.

Foto: vintage.kz