Qaırat Qojamjarov Ulttyq ulandy qarjylandyrýǵa qatysty usynys jasady

NUR-SULTAN. QazAqparat – Parlament Senatynyń jalpy otyrysynda depýtat Qaırat Qojamjarov Ulttyq ulannyń materıaldyq-tehnıkalyq jabdyqtalýyna nazar aýdaryp, Úkimet basshysynyń atyna depýtattyq saýal joldady, dep habarlaıdy QazAqparat tilshisi.

«Ulttyq ulan áskerı bólimsheleri elimizdegi qoǵamdyq qaýipsizdik pen azamattardyń quqyqtaryn qorǵaýda erekshe oryn alady. Ásirese, tótenshe jaǵdaı kezinde olar ómirleri men densaýlyqtaryna qaýip-qaterge qaramastan, óz áskerı mindetterin abyroımen oryndaýda. Ulttyq ulannyń áskerı daıyndyǵy men qyzmettik qabilettiliginiń joǵary deńgeıde bolýy – el turaqtylyǵynyń kepili. Sol sebepti osy salada sońǵy jyldary sheshimin tappaı júrgen júıeli máselelerdi qarastyrýlaryńyzdy suraımyz», - dedi senator Premer-Mınıstrge joldaǵan depýtattyq saýalynda.

Osy oraıda Q. Qojamjarov áskerı bólimshelerdi zamanaýı qarý-jaraqpen, arnaıy jáne jeke qorǵanys quraldarymen jabdyqtaý máselesine toqtaldy.

Sonymen qatar depýtat Ulttyq ulan áskerı qyzmetshilerin turǵyn úımen qamtý jáne jalpy áskerı tamaqtandyrý qunyna qatysty máselelerge de toqtalyp, aıtylǵan túıtkilderdi sheshý joldaryn usyndy.