Qaırat Qojamjarov Senat depýtaty retinde ant berdi
NUR-SULTAN. QazAqparat - Parlament Senatynyń jalpy otyrysynda depýtat Qaırat Qojamjarovtyń ant berýi rásimi ótti, dep habarlaıdy QazAqparat tilshisi.
«Qazaqstan halqyna adal qyzmet etýge, Qazaqstan Respýblıkasynyń tutastyǵy men Táýelsizdigin nyǵaıtýǵa, onyń Konstıtýtsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin!», - dedi Qaırat Qojamjarov.
Sonymen qatar Q. Qojamjarov Senattyń turaqty komıtetiniń quramyna saılandy. Ol Halyqaralyq qatynastar, qorǵanys jáne qaýipsizdik turaqty komıtetiniń múshesi boldy.
Esterińizge sala keteıik, Memleket basshysynyń Jarlyǵymen Qaırat Perneshuly Qojamjarov Qazaqstan Respýblıkasy Parlamenti Senatynyń depýtaty bolyp taǵaıyndaldy.
Ol buǵan deıin QR Bas prokýrory qyzmetin atqarǵan bolatyn.
Aıta keteıik, Parlament Senatynyń jalpy otyrysynda Darhan Satybaldynyń depýtattyq ókilettigin toqtatý týraly sheshim qabyldandy.
Esterińizge sala keteıik, jaqynda Darhan Amangeldiuly Satybaldy Qazaqstan Respýblıkasynyń Ózbekstan Respýblıkasyndaǵy Tótenshe jáne Ókiletti Elshisi qyzmetine taǵaıyndaldy.
