Qaırat Qojamjarov qazaqstandyq prokýrorlarǵa úndeý jarııalady

ASTANA. QazAqparat - Memleket basshysy Nursultan Nazarbaevtyń bıylǵy Joldaýyna baılanysty QR Bas prokýratýrasynyń saıtynda Bas prokýror Qaırat Qojamjarovtyń qazaqstandyq prokýrorlarǵa úndeýi jarııalandy, dep habarlaıdy «QazAqparat» HAA tilshisi.

«Eldiń strategııalyq turǵyda damýynyń basym baǵyttarynyń biri retinde Ult Kóshbasshysy zańnyń ústemdigi men sybaılas jemqorlyqqa qarsy kúresti jeke atap ótedi. Qazirgi ýaqytta atalǵan tapsyrma barlyq quqyq qorǵaý organdary jumysynyń basty baǵdary bolyp tabylady. Eń aldymen, Nursultan Ábishuly búgingi tańda zańnyń ústemdigi úshin sot jáne quqyq qorǵaý júıelerindegi ınstıtýtsıonaldyq ózgeristerdiń mańyzyn erekshe atap ótti», - deıdi QR Bas prokýrory.

Qaırat Qojamjarov atap ótkendeı, Prezıdenttiń bastamasy boıynsha ótken jyly Zań qabyldanyp, quqyq qorǵaý salalary aıtarlyqtaı jańǵyrtylǵan. Aldaǵy ýaqytta da barlyq quqyq qorǵaý organdary Prezıdenttiń tapsyrmasyn júzege asyrýǵa kúsh salatyn bolady.

«Óz kezeginde prokýratýra organdary baqylaýdy kúsheıtý arqyly óz mindetterin oryndap, sybaılas jemqorlyqqa qarsy kúres pen quqyq buzýshylyqtardyń aldyn alý baǵytynda organdardyń jumysyn úılestiretin bolady. Sizderdiń nazarlaryńyzdy tórtinshi ónerkásiptik revolıýtsııa jaǵdaıynda quqyq qorǵaý júıesin tsıfrlyq tehnologııalarsyz damytý múmkin emes ekenine aýdarǵym keledi. Osyǵan baılanysty qylmystyq sot isi kezeń-kezeńmen elektrondy formatqa kóshiriledi. Tsıfrlandyrý bizdiń halyqpen qarym-qatynas jasaý salasyn da qamtıdy. Bul artyq bolyp otyrǵan ákimshilik kedergilerdiń kózin joıady», - deıdi Qaırat Qojamjarov.

Onyń sózine súıensek, zańdy jáne jeke tulǵalardyń ótinishiniń laıyqty ári ýaqtyly sheshilýi azamattardyń quqyqtarynyń qorǵalýynyń tıimdi quraly bola bilýi kerek. Ol úshin keleshekte Quqyq qorǵaý qyzmetteriniń ortalyqtarynyń jumysyn kúsheıtilmek.

«Bizdiń jumysymyzdyń basty baǵasy - halyqtyń senimine ıe bolý deńgeıin odan ary kóterý», - deıdi QR Bas prokýrory.