«Qaırat» - «Kopengagen» matchy: almatylyq polıtseıler Danııa astanasynda ne istep júr

ALMATY. KAZINFORM — 2025 jylǵy 26 qarashada Danııa astanasy Kopengagende almatylyq «Qaırat» fýtbol klýby jergilikti «Kopengagen» komandasymen Chempıondar lıgasy aıasynda kezdesý ótkizedi. Danııaǵa otandyq fýtbolshylar ǵana emes, almatylyq polıtseıler de attanǵan.

Qalalyq polıtsııa departamentiniń habarlaýynsha, sapardyń negizgi maqsaty — halyqaralyq matchtar kezinde qoǵamdyq tártipti qamtamasyz etý júıesin jan-jaqty zerdeleý.

Polıtseıler stadıonnyń ınfraqurylymymen, kirý-shyǵý júıesimen, jankúıerlerdiń qozǵalys baǵyttarymen, quqyq buzýshylyqtyń aldyn alý sharalarymen jáne qaýipsizdik qyzmetteriniń ózara is-qımyl tártibimen tanysady.

— Úsh kún boıy polıtseıler eki tilde beınekúndelik júrgizip, Almatyda ótetin fýtbol matchtaryn uıymdastyrýǵa qoldanýǵa bolatyn tájirıbeni bólisedi, — delingen habarlamada.

Beınekúndelik materıaldary Almaty polıtsııa departamentiniń resmı akkaýnttarynda jarııalanyp otyrady.

Eske salaıyq, buǵan deıin «Qaırat» ÝEFA Chempıondar lıgasy aıasynda «Olımpıakos» jáne «Brıýggemen» Astanada oınaıtynyn jazǵanbyz.