«Qaırat» komandasy jankúıerleriniń «qylyǵy» úshin jazalanýy múmkin
ASTANA. QazAqparat - «Qaırat» komandasy Qazaqstan chempıonatynyń besinshi týrynda «Astanamen» bolǵan match kezindegi jankúıerleriniń qylyǵy úshin jazaǵa tartylýy múmkin. Jankúıerler qaırattyq eki oıynshy men komandanyń jattyqtyrýshysyna qyzyl kartochka kórsetken sýdıaǵa til tıgizgen bolatyn, dep habarlaıdy Vesti.kz. tilshisi.
Áńgime kezdesýdiń sońynda oryn alǵan oqıǵa jaıynda bolyp otyr. Almatylyq komandanyń jaqtaýshylary «Qaırat» komandasynyń eki oıynshysy men bas jattyqtyrýshysy Vladımır Vaıssty alańnan qýǵan bas tóreshige qaratyp dóreki sózder aıtyp, til tıgizgen bolatyn.
Qazaqstan fýtbol federatsııasynyń Qoǵammen baılanys departamentiniń dırektory Izmaıl Bzarovtyń aıtýynsha, «Qaırat» - «Astana» matchynyń ınspektory jankúıerlerge qatysty aqparatty raportqa engizgen.
«Jankúıerler matchtyń resmı ókilderine qaratyp dóreki sózder aıtty (sonyń ishinde tóreshiler brıgadasyna). Inspektor baıanatynyń negizinde jaqyn arada BTK-niń otyrysy ótip, onda matchtaǵy atalǵan oqıǵa men basqa da epızodtar qaralady», - dedi Bzarov.
Eske sala ketsek, atalmysh kezdesý Almaty qalasyndaǵy Ortalyq stadıonda ótip, teń eseppen aıaqtalyp edi. Sol oıynnan keıin «Astana» komandasy 11 upaımen týrnırlik kestede ekinshi orynǵa, al «Qaırat» 4 upaımen onynshy orynǵa turaqtady.
