«Qaırat» komandasy Slovakııa quramasynyń 30 jastaǵy oıynshysymen kelisim-shartqa qol qoıdy
ALMATY. QazAqparat - Fýtboldan Qazaqstan birinshiliginiń Premer-Lıgasynda óner kórsetetin Almatynyń «Qaırat» fýtbol klýby Slovakııa quramasynyń 30 jastaǵy qorǵaýshysy Lýkash Tesakpen kelisim-shartqa qol qoıdy. Bul týraly klýbtyń baspasóz qyzmetinen habarlady.
Lýkash óziniń fýtboldyq jolyn týǵan qalasy Jıar-nad-Gronomda bastaǵan. Keıin, «Dýbnıtsa» klýbyna aýysyp, tuńǵysh ret kásibı kelisim-shartqa qol qoıady.
«2005 jyly Tesak «Jılına» klýbyna aýysyp, osynda 4 jyl oınaıdy. Maýsymdardyń birinde «Rımovský Sobotý» klýbyna jalǵa beriledi. Keıin ol «Sennıtse» jáne «Tatrane» klýbtarynda óner kórsetedi. 2010 jyly Lýgansk qalasynyń «Zarıa» klýbyna aýysady. Ýkraına Premer-Lıgasynda eki jyl oınaǵan soń, Máskeýdiń «Torpedo» klýbyna aýysyp, komanda kapıtany atanady. Slovakııa quramasy sapynda eki match ótkizgen», - delingen habarlamada.
Aıtpaqshy, slovaktar Eýro-2016 aıasynda toptyq kezeńde Anglııa, Reseı jáne Ýels quramalarymen kezdesedi.
«Qaırat» pen Lýkash Tesak arasyndaǵy kelisim-shartqa 2+1 shemasy boıynsha qol qoıyldy.
