«Qaırat» komandasy qataryna qyrǵyzstandyq fýtbolshy qosyldy
NUR-SULTAN. QazAqparat - Almatynyń «Qaırat» fýtbol komandasy Qyrǵyzstan ulttyq quramasynyń jartylaı qorǵaýshysy Gúljigit Alyqulovpen kelisimshartqa qol qoıdy, dep habarlaıdy QazAqparat tilshisi klýbtyń baspasóz qyzmetine silteme jasap.
G. Alykýlov 2000 jyldyń 25 qarashasynda Bishkek qalasynda dúnıege kelgen. Jergilikti «Dordoı» komandasy sapynda úlken fýtboldaǵy alǵashqy qadamyn jasap, onda 2017 jylǵa deıin oıyn kórsetti. 2017 jyly Túrkııanyń «Antalıaspor» klýbynyń jastar quramynda jasyl alańǵa shyqty. 2018 jyly Qyrǵyzstanǵa oralyp «Qara-Balta» jáne «Alǵa» komandalarynyń namysyn qorǵady. Qyrǵyzstan Premer-lıgasynda barlyǵy 28 oıynda 7 gol soǵyp, 9 márte nátıjeli pas berdi.
Qyrǵyzstandyq fýtbolshy byltyr Belarýstiń Grodno qalasynyń «Neman» klýbynda 24 oıynǵa qatysty. Onda 4 gol soǵyp, 4 márte nátıjeli pas berdi.
Sondaı-aq, bıyl «Qaırat» sapyna qazaqstandyq shabýylshy Abat Aıymbetov te qosyldy. Ol byltyr «Aqtóbe» sapynda 29 oıynda 16 gol soǵyp, surmergender kóshinde aldyńǵy lekten kórindi. Abat Qazaqstan ulttyq quramasynda da oıyn kórsetedi.
Budan buryn Almatynyń «Qaıraty» aldaǵy maýsymǵa daıyndyǵyn bastap ketkenin habarlaǵan edik.
