Qaırat Kemalov halyqaralyq kınofestıvalde úzdik akter atandy
ASTANA. KAZINFORM – Akter, Qazaqstannyń eńbek sińirgen qaıratkeri Qaırat Kemalov halyqaralyq kınofestıvaldiń jeńimpazy atandy.
YARHA Festival halyqaralyq kınofestıvali Kamerýn astanasy ıAýnde qalasynda ótken.
Jerlesimiz «Aq boz úı» fılmindegi Pahraddın obrazy úshin «Úzdik er adam beınesi» atalymy boıynsha úzdik dep tanyldy.
«Bul men úshin kútpegen jaǵdaı boldy. Jalpy „Aq boz úı“ fılmi jaryqqa shyqqaly beri halyqaralyq kınofestıvalderge jıi shaqyrylyp júr. Fılm HH ǵasyrdyń basyndaǵy qazaq halqy kórgen qıyn-qystaý zaman men asharshylyq jaıynda. Jaqynda osy fılmniń rejısserin jáne meni Birikken Arab Ámirligine shaqyrǵan, oǵan densaýlyǵym syr berip bara almadym», — dedi Qaırat Kemalov.
Akterdiń aıtýynsha, «Aq boz úı» fılmin Kamerýndaǵy halyqaralyq kınofestıvalge «Qazaqfılm» AQ usynǵan.
«Bul fılmniń festıvalge qatysyp jatqanyn bilmeıdi ekenmin. Qazaqfılmnen fılm rejısseri habarlasyp, úzdik akter atandyń dep súıinshi surady. Júlde áli Kamerýnnan kelgen joq, tek sýretin jiberdi. Buǵan deıin byltyr Túrkııanyń Býrsa qalasynda ótken KORKUT ATA túrki álemi kınofestıvalinde „Úzdik er adam beınesi“ atalymy boıynsha jeńimpaz dep tanyldym», — deıdi ol.
Sondaı-aq, Qaırat Kemalov 40 jyldan astam teatr ártisi bolǵanyn aıtty, kınoǵa sońǵy jyldary kelgen.
Buǵan deıin rejısser Rústem Ábdirashtyń «Qazaq handyǵy» fılminde Kereı hannyń rólin somdaǵan.
Aıta keteıik, «Aq boz úı» fılmi Qazaqstannyń eńbek sińirgen qaıratkeri, jazýshy, kınodramatýrg Smaǵul Elýbaıdyń «Aq boz úı» romanynyń jelisi boıynsha túsirilgen.
Kınokartına ótken ǵasyrdyń 30-jyldarynda qazaq aýylynyń basyna túsken synaq, ıaǵnı ómirde bolǵan oqıǵany baıandaıdy.
Rejısser B.Elýbaıdyń fılmi bir otbasynyń tarıhyna toqtalyp, akter Qaırat Kemalov bı Pahraddınniń rólin somdady.
