Qaırat Kelimbetov krıptovalıýta týraly: Úleskerler sııaqty kúıip qalmaıyq
ASTANA. QazAqparat - "Astana" Halyqaralyq qarjy ortalyǵynyń basqarýshysy Qaırat Kelimbetov krıptovalıýta men blokcheınge qatysty pikir bildirdi, dep xabarlaıdy QazAqparat tilshisi.
"Búginde krıptovalıýtalar naryǵynyń kólemi 500 mlrd dollarǵa jetti. Osyǵan qatysty álem elderiniń kózqarasy qandaı? Bilýimshe, jaqynda G20-nyń qarjy mınıstrleri krıptovalıýtanyń jahandyq qaýpi joq degen sheshimge keldi. Biraq árbir eldiń qarjy retteýshisi bárin qadaǵalap otyrýy tıis. Bizdiń retteýshimiz, ıaǵnı Ulttyq bank bárin durys istep jatyr. Sebebi jańa texnologııalar shyqqanda alaıaqtar kóbeıedi. Olar xalyqty aldaıdy, aqshany san alýan joldarmen ıemdenip ketedi", - dedi Q.Kelimbetov Úkimet úıinde ótken baspasóz máslıxatynda.
Onyń aıtýynsha, buryn úleskerler jyljymaıtyn múlikpen qalaı utylsa, krıptovalıýtaǵa jappaı aqsha salǵandar da týra solaı utylýy ábden múmkin. Al ondaı jaǵdaıda memleket tarapynan kómek berýge týra keledi, bıýdjet qarjysyn shyǵarý qajet. Bunyń barlyǵy - shyǵyn.
"Sondyqtan atalǵan salany qadaǵalap otyrý kerek. Degenmen, álem boıynsha krıptovalıýtany árkim árqalaı retteıdi. Máselen, AQSh, Japonııa men Shveıtsarııada krıptovalıýtany rettep qana qoımaı, odan salyq alýdy da úırendi. Sosyn ınvestorlar tarapynan qyzyǵýshylyq qatty bolyp tur ǵoı. Sol sebepti keıbir elder ózara básekege túsip, krıptovalıýtaǵa qajetti jaǵdaı jasaýǵa tyrysady. Biz bolsaq, blokcheın texnologııasyn tolyǵymen qoldaımyz. Al krıptovalıýtany áli de zerdeleý kerek. Ol úshin "Astana" qarjy ortalyǵyn synaq aımaǵy retinde qoldanýǵa ábden bolady", - dep atap kórsetti Q. Kelimbetov.
Aıta keteıik, búgin "Astana" Halyqaralyq qarjy ortalyǵynyń basqarýshysy jaqsy jańalyqpen bólisti.
"Esterińizde bolsa, ótken aptada men 1 shildege deıin 50-ge jýyq kompanııanyń tirkeletini jaıynda aıtqan edim. Búgin jaqsy jańalyqpen bóliskim kelip otyr. Osy ýaqytqa deıin 55 kompanııa tirkelip úlgerdi. Jyldyń aıaǵyna deıin 100 kompanııa tirkeledi degen jospar bar. Demek, jospardyń jartysy oryndaldy. Álemdik qarjy uıymdary tarapynan qyzyǵýshylyq bar", - dep atap kórsetti Q.Kelimbetov.
