Qaırat Kelimbetov: Ekonomıkalyq gravıtatsııa qazir Azııaǵa bettep keledi
«Qazirgi tańda biz jahandyq syndardyń eki baǵytyn aıqyn kórip otyrmyz. Birinshi jaǵynan, ekonomıkalyq gravıtatsııa qazir burynǵy oryndardan Azııaǵa qaraı bettep keledi. Strategııalyq kartanyń zertteýine súıensek, jańa ekonomıkalyq damýdyń osy gravıtatsııasyn anyq baıqaımyz. Ol Ortalyq Azııaǵa da oıysatyn bolady. Sondyqtan, Ortalyq Azııaǵa da jahandyq qarjylardyń engeni mańyzdy. Mine, osy sebepti AHQO-nyń qurylýy - alǵa qaraı jyljýdy kózdegen baǵyttaǵy qadamdardyń biri bolyp tabylady», - dedi Qaırat Kelimbetov.
Onyń aıtýynsha, ekinshi jaǵynan búgingi kúngi qarjy ortalyqtarynyń júıesi aıtarlyqtaı ózgerip jatqan joq.
«Meniń oıymsha, Úlken tórttik (Nıý-Iork, Gonk-Kong, Sıngapýr, London) bir-birimen tyǵyz baılanysta jumys isteıdi. Biz qazir BREKSIT-ten keıin qandaı bir ózgerister oryn ala ma, joq pa nemese qarjylyq baǵyt Eýropanyń basqa da qalalaryna jyljı ma, sony keńinen talqylaǵan edik. Mine, osy turǵyda eshqandaı ózgeristerdiń joǵyn baıqap otyrmyz. Bizdiń kózqaras boıynsha, osy suraqtardy Ortalyq Azııa deńgeıinde talqylaıtyn bolsaq, ókinishke qaraı OA aımaqtyq jáne jahandyq bıznes-habtarmen qamtylmaǵan. Sondyqtan, biz bıznes hab pen qarjy ortalyǵyn dál osynda qurýdy kózdep otyrmyz», - dedi ol.
Onyń aıtýynsha, Qazaqstan 20 jyl boıy London, Nıý-Iork, Máskeýdegi qarjy ortalyqtarymen qamtylyp jatqan. Biraq, dál qazir Qazaqstan báseke túsip, Ortalyq Azııany osy baǵytta qamtýdy kózdep otyr. Astana Halyqaralyq qarjy ortalyǵy bul rette úlken múmkindikterge jol ashady.
«Ekinshi jaǵynan «bir beldeý - bir jol» baǵytyna mańyz berýdemiz. Sebebi, sońǵy 40 jylda Qytaı ekonomıkasynyń qatty qaryshtap damyp jatqanyn kórip otyrmyz. Olar ekonomıkasynyń esigin ashyp, reformalar júrgizip, ekonomıkasynyń róli kúnnen kúnge artyp keledi. Qarjy ortalyqtary Gonk-Kongpen birge Shanhaıda da ashylmaq. Sondyqtan, bul qadam Qytaıǵa aýqymdy ekonomıkalyq ósim berip, ózge de qarjy ortalyqtarymen baılanysty kúsheıtýine jol ashady. Demek, OA ishinde «Astana» HQO mańyzdy róldi atqara alady», - dep túıdi Qaırat Kelimbetov.
