«Qaırat» qarymta matchta «Levskıden» jeńilip, Chempıondar lıgasyndaǵy joryǵyn aıaqtady
TÚRKІSTAN. KAZINFORM – Túrkistan qalasyndaǵy «Túrkistan Arena» stadıonynda almatylyq «Qaırat» fýtboldan UEFA Chempıondar lıgasynyń úshinshi irikteý kezeńi aıasynda «Levskı» (Sofııa, Bolgarııa) komandasymen qarymta kezdesý ótkizdi.
Alǵashqy oıynda almatylyq komanda qarsylasyna 0:1 esebimen ese jibergen bolatyn. Sondyqtan «Qaırat» qarymta matchta esepti teńestirýge umtylyp, oıynnyń alǵashqy mınýttarynan belsendilik tanytty. Birneshe qaýipti shabýyl uıymdastyrǵanymen, qarsylas qaqpasynan sańylaý taba almady.
Alaıda qonaqtar da qarap qalmaı, shabýyldy údetip, «Qaırat» qaqpasyna qysym jasaı bastady. Kóp uzamaı 13-mınýtta «Levskı» esep ashty. Bolgarııalyq klýbtyń shabýylshysy Reınaldo múmkindikti múlt jibermeı, almatylyqtardyń qaqpasyna dál soqqy baǵyttady. Birinshi taımnyń qalǵan bóliginde «Qaırat» esepti teńestirýge tyrysqanymen, «Levskı» qorǵanysy syr bermedi.
Ekinshi taımda almatylyqtar shabýyldy kúsheıtip, qarsylas qaqpasyna birneshe ret qaýip tóndirdi. Alaıda «Levskı» oıynshylary qorǵanysta saýatty qımyldap, «Qaırat» shabýylshylaryna gol salýǵa múmkindik bermedi.
Nátıjesinde «Qaırat» qarymta kezdesýde de 0:1 esebimen jeńilip, eki oıynnyń qorytyndysy boıynsha 0:2 esebimen «Levskıge» jol berdi. Osylaısha almatylyq klýb UEFA Chempıondar lıgasyndaǵy joryǵyn úshinshi irikteý kezeńinde aıaqtady.
Buǵan deıin almatylyq ujym Chempıondar lıgasynda qarsylasynan jeńilgen jaǵdaıda Eýropa lıgasy pleı-off kezeńinde synǵa túsýge múmkindik alatynyn habarlaǵan edik. Onda olar PAOK (Grekııa) — «Anderleht» (Belgııa) jubynyń jeńimpazymen oınaıdy.
