«Qaırat» fýtzaldan Chempıondar lıgasy 1/4 fınalyna shyqty

ASTANA. KAZINFORM - Búgin, 5 jeltoqsanda fýtzaldan UEFA Chempıondar lıgasy 1/8 fınalynda qazaqstandyq «Qaırat» qarymta oıynyn ótkizdi.

Jarystyń atalǵan satysyndaǵy alǵashqy kezdesýde almatylyq klýb syrt alańda Belgııanyń «Anderleht» klýbyn 7:3 esebimen tize búktirgen edi.

Soǵan qaramastan qazaqstandyq komanda alǵashqy mınýttan tizgindi óz qolynda ustaýǵa tyrysty. Oıynnyń 10-mınýtynda «Qaırat» sapynan Jahangır Rashıt esep ashty. Degenmen odan keıin almatylyq ujym qaqpasyna qatarynan eki gol jiberip aldy. Aldymen Edý Borjesh 15-mınýtta tarazy basyn teńestirse, 18-mınýtta taǵy da kózdegen nysanadan múlt ketken joq.

Ekinshi kezeńde Birhan Orazov 23, 32-mınýttarda mergendik tanytsa, 36-mınýtta almatylyq klýb qaqpashysy Joao Paolo bos qalǵan qaqpaǵa gol engizdi.
Oıynnyń 39-mınýtynda belgııalyq klýbtan Stıven Dıllın esep aıyrmasyn qysqartsa, odan keıin almatylyq komandadan Attırson Sılva qorytyndy esepti belgiledi.

Osylaısha «Qaırat» qarsylasynan 5:3 esebimen basym túsip, jarystyń kelesi satysyna shyqty.

Endi elimizdiń atynan qazaqstandyq «Semeı» Frantsııanyń «Etýal» klýbymen qarymta oıyn ótkizedi. Semeıde ótken alǵashqy kezdesýde oıyn 3:3 esebimen teń aıaqtaldy.

2026 jyldyń 23 aqpany men 6 naýryzy aralyǵynda komandalar sol ereje boıynsha shırek fınalda synǵa túsedi.

Fınal 2026 jyldyń mamyr aıynda Italııanyń Pesaro qalasynda ótedi. Onda tórt komanda sheberlik baıqasady. Aldymen jartylaı fınal bolsa, odan keıin fınal men 3-oryn úshin oıyndar ótkiziledi.