«Qaırat» fýtzal komandasy «Astana» Prezıdenttik kásibı sport klýbynyń quramyna kirdi
ASTANA. QazAqparat - Almatynyń «Qaırat» fýtzal klýby «Astana» Prezıdenttik kásibı sport klýby» korporatıvtik qorynyń quramyna endi jáne ataýyn «Astana-Qaırat» dep ózgertti.
Búgin «Samuryq-Qazynada» «Astana-Qaırat» AFK prezıdenti Qaırat Orazbekov pen Olımpıada chempıony, «Astana» PKSK» KQ-nyń bas dırektory Vladımır Smırnov klýb quramyna birigý týraly kelisimge qol qoıdy.
«Astana-Qaırat» klýby Qazaqstan namysyn halyqaralyq sport arenasynda sátti qorǵap júr. Bul tek onyń bastapqy qadamdary ǵana. «Astana» klýby men «Astana-Qaırat» qazaq fýtzalynyń órisin keńeıte túsetin bolady», - dedi V. Smırnov kelisimge qol qoıý rásiminde. Onyń atap kórsetkenindeı, klýbtyń 80 paıyz bıýdjetin «Astana» prezıdenttik klýby kótermek. Qalǵan 20 paıyzyn «Astana-Qaırattyń» óz qarajat kózderinen óteledi.
Óz kezeginde «Astana-Qaırat» klýbynyń basshysy Q. Orazbekov komanda Astanaǵa kóshirilmeıtinin, Almaty bazasynda el namysyn qorǵaı beretinin jetkizdi.
«Astana-Qaırat» dep atalǵanymen klýb sol baıaǵysha Almatyda ornalasatyn bolady. Menińshe, almatylyq jankúıerlerge alańdaıtyn eshteńe joq. Endi klýb menedjmenttiń halyqaralyq deńgeıine kóterildi. Bul qazaqstandyq komanda, sondyqtan ony bólip-jarýdyń ózi kerek emes», - deıdi klýb prezıdenti.
Onyń aıtýynsha, «Astana» klýbynyń qarjylandyrýy «Astana-Qaıratqa» eldegi ózge klýbtarǵa qaraǵanda basymdyq ápermeıdi.
"Bıýdjettiń kólemi sol qalpynda qalady, ony kez kelgen oblys ákimdigi kótere alady. Másele tek ákimderde jatyr. Eger damytamyz dese, Aqtóbe, Qaraǵandy mektepteri óte keremet. Tek jaqsy qolǵa alsyn. Al «Astana» klýbynan túsken qarajat qaltaǵa emes, balalar jattyǵatyn úlken fýtzal bazasyn salýǵa jumsalady», - dep atap ótti ol.
