«Qaırat» fýtzal klýbynyń bas bapkeri qyzmetinen ketti

ASTANA. KAZINFORM – Almatylyq «Qaırat» fýtzal klýby bas bapker Marlon Velaskonyń qyzmetinen ketkenin resmı túrde habarlady. 

Meta-ratings.kz sport portalynyń málimetinshe, ıspanııalyq jattyqtyrýshymen eńbek sharty aıaqtalyp, taraptar kelisimshartty uzartpaý týraly sheshim qabyldaǵan. 

Velasko 2023 jyldyń tamyz aıynan bastap «Qaırat» klýbynyń tizginin ustady. Osy ýaqyt aralyǵynda ol klýbpen birge kóptegen aıtýly jetistikke qol jetkizdi. Atap aıtqanda, onyń jetekshiligimen almatylyq komanda eki ret Qazaqstan Sýperkýbogyn jeńip aldy. El kýbogy men Portýgalııada ótken halyqaralyq Masters Cup týrnıriniń jeńimpazy boldy. 2025 jyly fýtzaldan UEFA Chempıondar lıgasynyń kúmis júldesin enshiledi. 

«Qaırat» fýtzal klýby ujymy Marlon Velaskoǵa atqarǵan jumysy úshin alǵys aıtyp, aldaǵy bapkerlik mansabyna sáttilik tiledi. 

Beıresmı aqparat boıynsha, pleı-off kezeńi aıaqtalǵansha komandany klýbtyń sport dırektory Gýstavo Paradeda jattyqtyrýy múmkin. 

Eske sala keteıik, buǵan deıin Shymkent prokýratýrasy «Ordabasy» fýtbol klýbynyń burynǵy basshylyǵyna qatysty qylmystyq is qozǵaǵanyn jazǵan edik.