«Qaırat» fýtzal klýby «Kartahenamen» match aldynda jankúıerlerine úndeý jasady
ALMATY. KAZINFORM – «Qaırat» fýtzal klýbynyń basshylyǵy men oıynshylary UEFA Chempıondar lıgasynyń shırek fınalynda Ispanııanyń «Kartahena» komandasyna qarsy ótetin match týraly aıtyp, aldaǵy oıyndarǵa qatysty josparymen bólisti.
Komanda Eýropanyń basty týrnıriniń shırek fınalyna joldama alyp, 23 aqpanda Almatydaǵy Balýan Sholaq atyndaǵy Sport saraıynda ıspanııalyq «Kartahena» klýbyna qarsy alǵashqy oıynyn ótkizedi. Qarymta kezdesý 6 naýryzda Ispanııada ótedi, eki oıynnyń qorytyndysy boıynsha jeńiske jetken komanda UEFA Chempıondar lıgasynyń Tórttik fınalyna shyǵady.
«Qaırat» fýtzal klýbynyń sport dırektory Gýstavo Paradeda men komanda kapıtany Birjan Orazov klýbtyń josparlary týraly aıtty.
UEFA Chempıondar lıgasynyń osy maýsymy fýtzal úshin erekshe boldy: jarys alǵash ret úıde jáne syrt alańda ótetin matchtar formatynda uıymdastyrylyp otyr. Bul jarysty tartysqa toly etip, kórermenniń delebesin qozdyrdy. Aıta keteıik, ótken maýsymda almatylyq klýb Chempıondar lıgasynyń fınalyna deıin jetip, kúmis júldeni ıelengen.
– Aqpan aıynda UEFA kýbogy úshin oınaımyz. Biz osy kýbokty eki ret jeńip alǵanbyz. Bul – eń joǵary deńgeıdegi jarys. Sonymen qatar bıyl almatylyq klýbtyń qurylǵanyna – 30 jyl. Sondyqtan osy jyly úshinshi UEFA kýbogyn alýdy kózdep otyrmyz. Árıne, qarsylasymyz da óte myqty Ispanııanyń «Kartahena» komandasy, olar – óz elderiniń absolıýtti chempıondary. Bizdi óte tartysty oıyn kútip tur. Alǵashqy matchty Almatyda ótkizemiz. 23 aqpanda jankúıerlerimizdiń qoldaýyn asyǵa kútemiz, barshańyzdy Balýan Sholaq atyndaǵy Sport saraıyna shaqyramyz. Sizder qoldasańyzdar, jeńiske jetý jeńildeý bolady, - dedi Gýstavo Paradeda.
1995 jyly Almatyda qurylǵan «Qaırat» fýtzal klýby osy ýaqyt ishinde Qazaqstandaǵy eń ataqty klýbqa aınaldy. Komanda UEFA Chempıondar lıgasynyń eki dúrkin jeńimpazy (2013 jáne 2015 jyldar), Qazaqstan chempıonatynyń 21 dúrkin chempıony, sonyń ishinde qatarynan 20 chempıondyq ataqqa qol jetkizgen biregeı serııanyń ıegeri, sondaı-aq Qazaqstan kýbogy men Sýperkýbogynyń birneshe dúrkin jeńimpazy boldy.
2024-2025 maýsymynda «Qaırat fýtzal» taǵy bir mańyzdy qadam jasap, áıelder komandasyn qurdy. Qazaqstan chempıonatyndaǵy debıýttik maýsymynda áıelder komandasy birden el chempıony atandy.
Eske salaıyq, buǵan deıin qazaqstandyq «Qaırat» komandasy halyqaralyq Futsal Planet premııasyna úmitker retinde usynylǵanyn habarlaǵanbyz.