«Qaırat» fýtzal klýby bas bapkerimen qosh aıtysty
ASTANA. KAZINFORM — «Qaırat» fýtzal klýby men bas bapker Danıel Jýnıor arasyndaǵy kelisim aıaqtaldy. Bul jóninde komandanyń baspasóz qyzmeti málim etti.
Klýb pen maman arasyndaǵy kelisimshart otbasylyq jaǵdaılarǵa baılanysty jáne eki taraptyń ózara kelisimi negizinde toqtatyldy.
Danıel Jýnıor komandaǵa osy maýsymnyń basynda kelip, «Qaırat fýtzalmen» birge Qazaqstan Sýperkýbogyn jeńip aldy jáne ÝEFA Chempıondar lıgasynyń shırek fınalyna deıin jetti.
Danıel Jýnıor 1979 jyly 15 qazanda dúnıege kelgen. 2006 jyldan beri bapkerlik qyzmetpen aınalysady. Qazirge deıin Brazılııanyń «ABC» (Natal), «Shashıense» (Shashın), «Mafra», «Kapıvarı» (Kapıvarı-dı-Baıshý), «Joınvıl», «ACEL Shopınzınıý» (Shopınzınıý) jáne «Kampý-Moran» klýbtarynda eńbek etti.
Bıyl Chempıondar lıgasy ¼ fınalynda «Qaırat» ıspanııalyq «Kartahena» (1:2, 4:7) klýbtaryna ese jiberdi.
