«Qaırat» fýtbolshylarynyń jankeshtiligine rıza boldym – Habı Alonso

ALMATY. KAZINFORM — Madrıdtik «Realdyń» bas bapkeri Habı Alonso Almatyda «Qaırat» fýtbol klýbyn 5:0 esebimen jeńgennen keıin oıyn týraly qysqasha pikir bildirdi, dep habarlaıdy Kazinform tilshisi. 

Alonso almatylyq klýb Chempıondar lıgasynda laıyqty oınaıtynyn aıtty. 

— Biz Chempıondar lıgasynyń oıyny almatylyqtar úshin qanshalyqty mańyzdy ekenin kórdik. «Qaırat» kezdesýdiń basynda óte jaqsy oınady. Al, biz kerisinshe bul alańda ózimizdi jaısyz sezindik jáne alǵashqy mınýttarda komandalyq oıyn kórsete almadyq. Biraq penaltıden keıin meniń komandam jaqsy oınaı bastady. Jalpy men «Qaırat» fýtbolshylarynyń jankeshtiligine rıza boldym, - dedi Habı Alonso. 

Bas bapker komandasymen birge Almatyny aralap úlgermegenin, alaıda Almaty taýlaryna barǵysy keletinin jasyrmady. 

— Bul jerde atmosfera keremet boldy dep aıta alamyn. «Qaırat» komandasyna, Almatyǵa jáne Qazaqstan memleketine bar jaqsylyqty tileımin. Búgin basty maqsatymyzdy oryndap, jeńiske qol jetkizdik. Neǵurlym kóp gol soqsaq, soǵurlym jaqsy bolatynyn bildik, - dedi Habı Alonso. 

Bul rette «Realdyń» bas bapkeri Habı Alonso «Qaırattyń» birde-bir oıynshysyn erekshe atap ótken joq. 

Buǵan deıin habarlaǵanymyzdaı, «Qaırat» óz alańynda madrıdtik «Realdan» iri eseppen jeńildi.