«Qaırat» fýtbolshylary Danııada alǵashqy jattyǵýyn ótkizdi
ASTANA. KAZINFORM — Almatylyq «Qaırat» Danııa astanasyna baryp, Chempıondar lıgasynyń jalpy kezeńiniń besinshi týry aıasynda «Kopengagenge» qarsy ótetin match aldyndaǵy alǵashqy jattyǵýyn ótkizdi, dep habarlaıdy Kazinform agenttigi.
Klýbtyń baspasóz qyzmeti jarııalaǵan kadrlarǵa qaraǵanda, Kopengagende aýa temperatýrasy nólden tómen jáne dymqyl qar jaýyp tur. Soǵan qaramastan, bas bapker Rafael Ýrazbahtınniń shákirtteri kóterińki kóńil-kúıde — fotosýretterden komandanyń derlik barlyq negizgi oıynshylaryn kórýge bolady.
Kezdesý 26 qarasha kúni «Parken» stadıonynda ótedi. Oıyn Qazaqstan ýaqyty boıynsha 22:45-te bastalady.
Tórt týrdan keıin «Kopengagen» men «Qaırattyń» árqaısysynda bir-bir upaıdan bar jáne olar jalpy kezeń kestesinde tıisinshe 33-shi jáne 34-oryndardy ıelenip otyr. Dat klýby tek soǵylǵan jáne jiberilgen goldar aıyrmasy boıynsha ǵana joǵary tur.
Buǵan deıin «Qaırat» syrt alańda «Interge» 2:1 esebimen jol berse, «Kopengagen» qonaqta «Tottenhemnen» 0:4 esebimen jeńildi.
Sondaı-aq komandamen birge Danııaǵa Almaty qalalyq polıtsııa departamentiniń qyzmetkerleri de iri sporttyq is-sharalarda qaýipsizdikti qamtamasyz etý boıynsha tájirıbe almasý maqsatynda barǵany habarlandy.