«Qaırat» fýtboldan Chempıondar lıgasyn jeńispen bastady
ASTANA. KAZINFORM - Búgin fýtboldan UEFA Chepıondar lıgasy birinshi irikteý kezeńinde almatylyq «Qaırat» óz alańynda Chernogorııanyń «Sýteska» komandasyn qabyldady.
Kezdesý barysynda qazaqstandyq komanda alǵashqy mınýttan tizgindi óz qolynda ustaýǵa tyrysty. Qarsylas komanda qaqpasy mańynda jıi boı kórsetip, gol soǵatyn múmkindikti izdedi. Soǵan qaramastan chernogorııalyq fýtbolshylar óziniń aıyp alańynda saýatty qorǵana bildi. Nátıjesinde birinshi kezeńde tablodaǵy esepke ózgeris engen joq.
Ekinshi kezeńde de dál osyǵan uqsas jaǵdaı órbidi. Oıynnyń 76-mınýtynda almatylyq klýbtan Lýkas Afrıko esep ashsa, 90-mınýtta «Sýteska» sapynan Marko Mrvalevıch tarazy basyn teńestirdi.
Al 93-mınýtta «Qaırat» shabýylshysy Mark Gýal qorytyndy esepti belgiledi.
Osylaısha olar qarsylasynan 2:1 esebimen basym tústi. Endi komandalar 15 shildede qarymta oıyn ótkizedi.
Aıta ketsek, almatylyq klýb ótken maýsymda Chempıondar lıgasy negizgi kezeńinde Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4, Anglııanyń «Arsenalyna» 2:3 esebimen jol berse, Kıprdiń «Pafosymen» 0:0 esebimen teń tústi.
Aıta ketsek, Konferentsııa lıgasyndaǵy oıyndaryn «Astana» jáne «Elimaı» birinshi irikteý kezeńinen bastaıdy. Alǵashqy irikteý kezeńinde «Astana» Albanııanyń «Dınamo Sıtı», semeılik «Elimaı» Armenııanyń «Alashkert» klýbtarymen sheberlik aıqasady.
