«Qaırat» — fýtboldan 2024 jylǵy Qazaqstan chempıony

ASTANA. KAZINFORM — Almatylyq «Qaırat» fýtboldan 2024 jylǵy Qazaqstan chempıony atandy.

Búgin Premer-lıgasynyń qorytyndy HHVІ týryndaǵy oıyndardyń barlyǵy bir ýaqytta bastaldy. Sondyqtan sońǵy mınýttarǵa deıin bas júlde taǵdyry sheshilgen joq. Chempıondyq ataqqa talas «Qaırat» pen «Astana» arasynda ótti. Atalǵan týrda «Qaırat» syrt alańda «Atyraýmen» kezdesse, «Astana» Almatyda «Jetisýdy» qabyldaıdy. 

Almatylyq klýb birinshi kezeńde qarsylas qaqpasyna gol soǵa alǵan joq. Ekinshi kezeńde atyraýlyq ujymnan Nıkıta Stepanov dóreki áreketine baılanysty qyzyl qaǵaz alyp, alańnan qýyldy. Al 59-mınýtta «Qaırat» sapynan Gıorgı Zarııa penaltıden múlt ketken joq.

Almatylyq ujym qarsylasyn 1:0 esebimen jeńip, bıylǵy jyldyń chempıony atandy. Olar budan buryn 1992, 2004, 2020 jyldary jeńis tuǵyryna kóterilgen edi.

Elordalyq komanda birinshi kezeńniń ózinde qarsylas qaqpasyna bes gol soǵyp úlgerdi. Ony Djeffrı Chınedý 7, Nazmı Grıpshı 18, Marın Tomsaov 25, Karlo Bartloets 41-mınýtta gol soqsa, taldyqorǵandyq klýbtan Egor Tkachenko 31-mınýtta avtogoldyń avtory atandy.

Osylaısha «Astana» qarsylasynan 5:0 esebimen basym túsip, ekinshi oryndy mise tutty. 

Sondaı-aq «Aqtóbe» óz alańynda «Turandy» 2:0 esebimen tize búktirip, úzdik úshtikti túıindedi.

Al «Ordabasy» «Elimaıdy» 2:1 esebimen jeńse, «Tobyl» syrt alańda «Qaısarǵa» 0:2 esebimen ese jiberdi.

Atalǵan týrdaǵy «Qyzyljar» men «Jeńis» kezdesýi kesh bastalǵandyqtan áli ótip jatyr.