«Qaırat» fýtbol klýbyna el birinshiliginiń kúmis medaldar tabys etildi (FOTO)
«Bıylǵy maýsymda «Qaırat» komandasy - oıyndaryn jankúıerler eń kóp tamashalaǵan klýbqa aınaldy. Bıylǵy birinshilikte «Qaırattyń» oıynyn kórýge barlyǵy - 140 myń jankúıer keldi. Sondaı-aq, bizdiń klýb óz tarıhynda fýtboldan ÝEFA-nyń Eýropa Lıgasynyń pleı-off kezeńine ótti. Munyń barlyǵy otandyq fýtboldyń damýyna septigin tıgizedi. Sporttyń bul túri elimizde áleýmettik mańyzǵa ıe. Óıtkeni, ol jastardy otansúıgishtikke, birlikke tárbıeleıdi, boılarynda patrıottyq rýh qalyptastyrady. Moıynǵa taǵylǵan medaldardyń túsi jyl ótken saıyn kómeskilenýi múmkin, alaıda jankúıerlerdiń qurmeti men súıispenshiligi eshqashan da umytylmaıdy», - dedi «Qaırat» fýtbol klýby Baqylaý Keńesiniń tóraǵasy Qaırat Boranbaev.
Sonymen qatar, búgin «Qaırat» fýtbol klýbynyń basshylyǵyn, oıynshylary men jattyqtyrýshylar quramyn quttyqtaýǵa QR Mádenıet jáne sport vıtse-mınıstri Sáken Musaıbekov pen Almaty qalasynyń ákimi Baýyrjan Baıbek keldi.
«Almatylyq klýb balalar sportynyń damýyna kóp kóńil bólip keledi. 2014 jyly klýbtyń Jasóspirimder akademııasy quryldy. Búgingi saltanatty shara sol bazada ótip jatyr. Akademııanyń tárbıelenýshileri kúni búginge deıin birqatar halyqaralyq týrnırlerge qatysyp úlgerdi. Endi aldaǵy jyly 18 jasqa deıingi U-18 Chempıondar lıgasyna qatysady. «Qaırat» shynynda da óziniń shynaıy tarıhy, dástúri bar naǵyz halyqtyq komandaǵa aınaldy», - dedi B. Baıbekov.
Marapattaý rásimi barysynda «Qaırat» komandasynyń volonterleri men adal jankúıerlerine de estelik retinde baǵaly syılyqtar tabys etildi.
Aıta ketelik, marapattaý rásimine «Qaırat» klýbynyń ardagerleri, QR fýtbol federatsııasynyń ókilderi, akademııa tárbıelenýshileriniń ata-analary jáne basqa da múddeli tulǵalar qatysty.
