«Qaırat» fýtbol klýby jankúıerlerin aldap soqty
ASTANA. QazAqparat - «Qaırat» fýtbol klýby 1 sáýirde Almatyǵa tanymal ıtalıandyq bapker Lýchano Spalettı komanda basshylyǵymen kelisimshartqa qol qoıý úshin kele jatyr degen aqparat jarııalady.
«Áıgili bapkermen kelisimshart 0,5 + 2 jyl júıesi boıynsha jasalady. Tańerteń «Qaırat» FK Spalettıge barlyq ınfraqurylymdardy kórsetip shyǵady. Tústen keıin ol klýb qyzmetkerimen birge Almaty syrtynda ornalasqan turǵylyqty jerin kórip shyǵady. Ázirge bonýs somasy jaıynda kelisim joq, degenmen taraptar ymyraǵa kelýge daıyn. Aıta keteıik, Lýchano Spalettı óziniń bapkerlik shtabymen birge keledi. Italıandyq mamannyń aldyna «Qaırat» klýbyn ÝEFA Eýropa Lıgasynyń 1/4 fınalyna shyǵarý mindeti qoıylyp otyr», - dep jazylǵan «Qaırat» fýtbol klýbynyń resmı saıtynda.
Ázilmen jiberilgen «qaýesetti» qazaqstandyq jankúıerler áleýmettik jelilerde qyzý talqylap jatyr. Sonymen qatar birqatar reseılik basylymdar, klýb basshylyǵynyń bul qaljyńyn joǵary baǵalap, ózderiniń jańalyqtar taspasyna da jarııalap jibergen. Lýchano Spalettı jaqynda ǵana Reseıdiń «Zenıt» klýbynan ketken bolatyn. 2009 jyly ol Sankt-Peterbýrg qalasynyń beldi komandasyn jattyqtyrý úshin ıtalıandyq «Roma» klýbynan aýysqany esimizde.
