«Qaırat» fýtbol klýby Shora Sarybaevtyń otbasyna kóńil aıtty
ASTANA. QazAqparat - Almatylyq «Qaırat» fýtbol klýby 94 jasyna qaraǵan shaǵynda dúnıeden ozǵan belgili fılolog, professor Shora Sarybaevtyń otbasyna kóńil aıtty, dep habarlaıdy QazAqparat klýbtyń resmı saıtyna silteme jasap.
FK ókilderiniń habarlaýynsha, Shora Sarybaev - «Qaırat» fýtbol klýbynyń eń belsendi jankúıeri bolǵan.
«Professor Shora Sarybaev uzaq jyldar boıy «Qaırat» FK týraly tarıhı derekterdi jınaqtaǵan adam. Osylaısha, Shora Shamǵalıuly halyqtyń súıikti komandasy týraly biregeı materıaldar toptamasyn jasady. Onyń eren eńbeginiń arqasynda «Qaırat» FK mýzeıi kóptegen tyń derektermen tolyqty. «Qaırat» fýtbol klýby óziniń eń belsendi jáne qurmetti jankúıeriniń dúnıeden ozýyna baılanysty Sarybaevtar otbasyna kóńil aıtady», - dep habarlandy ataqty klýbtyń resmı saıtynda.
Eske sala ketsek, qazaq tili dıalektologııasy ǵylymynyń negizin qalaýshylardyń biri, QR Ulttyq Ǵylym Akademııasynyń akademıgi, professor Shora Shamǵalıuly Sarybaev 94 jasqa qaraǵan shaǵynda qaıtys boldy.
Marqummen qoshtasý rásimi 3 mamyr kúni saǵat 10.00-de Almatydaǵy Ǵylym Akademııasy ǵımaratynda (Qurmanǵazy kóshesi, 29-úı) ótedi.
