«Qaırat» fýtbol klýby serbııalyqtarǵa ese jiberdi
ASTANA. QazAqparat - Túrkııada ótken alǵashqy sheteldik oqý-jattyǵý jıynynyń aıasyndaǵy sońǵy joldastyq kezdesýde almatylyq «Qaırat» serbııalyq «Vojdovats» komandasymen kezdesti, dep jazady Sports.kz.
«Qaırat» atalmysh kezdesýde Karavaev, Súıinbaev, Gogýa, Bato, Ahmetov, Elek, Qýat, Islamhan, Arshavın, Jýkov, Anene sııaqty oıynshylardy shyǵardy. Kezdesýdiń sońyna deıin qazaqstandyq komanda basymdyq tanytty. Alaıda olar ózderine berilgen múmkindikti nátıjeli aıaqtaı almady.
Osyǵan qarap olardyń baby áli de jetispeı turǵandyǵyn baıqaýǵa bolatyn edi. Esesine qarsylas komanda senimdi ári uıymshyl qımyldaı bildi. Olar oıynnyń birinshi jartysynda gol soqty. «Vojdovats bul jetistikti oıyn sońyna deıin saqtaı bildi. Nátıjesinde esep: 1:0. Serbter jeńiske jetti.
Bul kezdesý almatylyqtar úshin oqý-jattyǵý jıynyndaǵy úshinshi oıyn boldy. Osyǵan deıin qazaqstandyqtar bolgarııalyq «Lýdgoretsti» (3:2) jeńgen bolatyn. Sońynan reseılik «Dınamo» klýbymen oınap, teń tústi (3:3).
