«Qaırat» fýtbol klýby «Pahtakormen» joldastyq kezdesý ótkizedi
ALMATY. 26 jeltoqsan. QazAqparat - «Qaırat» fýtbol klýby ekinshi oqý jattyǵý jıynyn qańtar aıynda Ábý-Dabı qalasynda ótkizbek.
Onda 11-i qańtarda Tashkent qalasynyń «Pahtakor», 14-de Germanııanyń «Gambýrg», 19-da Reseıdiń «Krasnodar» komandasymen joldastyq match ótkizbek.
Buǵan deıin olar Túrkııanyń Belek qalasynda ótken alǵashqy oqý-jattyǵý jıynynda «Tarazǵa» 0:1 bop utylyp, Qyzylordanyń «Qaısaryn» 2:1 esebimen jeńgen bolatyn. Klýb serbııalyq qorǵaýshy Jarko Markovıchpen 3 jyldyq kelisimshartqa otyrdy. Ol 2004-2006 jyldary Belgrad qalasynyń «Sopot», al 2006-2008 jyldary «BASK» klýbtarynda óner kórsetken, 2008-2013 jyldary Rýmynııanyń «GazMetanMedıash» klýbynda baq synaǵan bolatyn.
Almatylyqtardyń aldaǵy qarsylastaryna az-kem toqtalatyn bolsaq. 1956 jyly qurylǵan «Pahtakor» Ózbekstan chempıonatynda 8 dúrkin chempıon, 5 ret kúmis júldeger atanyp, 10 ret el kýbogyn ıelengen. 1887 jyly negizi qalanǵan «Gambýrg» klýby bolsa Germanııanyń 6 dúrkin chempıony, 8 ret kúmis júldeger atanyp, 3 ret el kýbogyn, 2 ret Nemis lıgasy kýbogyn, 1 ret Eýropa chempıondary kýbogyn enshilegen. Al 2008 jyly qurylǵan krasnodarlyq fýtbolshylar 2008 jyly Ekinshi dıvızıonnyń «Ońtústik» aımaǵynda - 3, 2009 jyl Birinshi dıvızıonda - 10, 2010 jyly - 5, 2001/2012 jyldardaǵy maýsymda Premer-Lıgada - 9, al 2012/13 jyldardaǵy maýsymda - 10 oryn alǵan bolatyn.
