«Qaırat» fýtbol klýby akademııasynyń oıynshysy Álem quramasyna shaqyryldy
ALMATY. QazAqparat- «Qaırat» fýtbol klýby akademııasynyń oıynshysy, jartylaı qorǵaýshy Ramazan Orazov 17 jasqa deıingi fýtbolshylar boıynsha (U-17) Álem quramasynyń sapyna shaqyryldy. Bul týraly búgin «Qaırat» fýtbol klýbynyń baspasóz qyzmetinen habarlady.
Ramazan Orazov taǵy bir qazaqstandyq jas talant - Qaraǵandynyń «Shahter» komandasynyń jas oıynshysy Oralǵan Ómirtaev ekeýi jyl saıyn ótkizilip turatyn «Al-Kass International Cup-2015» týrnırinde álem elderiniń oıynshylarynan quralǵan «Aspire International» komandasynyń sapynda óner kórsetetin bolady.
«Qazaqstandyq fýtbolshylar 1998 jyly týǵan jas fýtbolshylardan quralǵan komandalar arasynda ótken Qazaqstan birinshiliginde joǵary dárejede óner kórsetkenderi úshin tańdap alyndy. Qazaqstannyń jasóspirimder komandalarynyń jattyqtyrýshylary birinshilik barysynda úzdik oıynshylarǵa tańdaý júrgizip, balalar-jasóspirimder fýtboly bólimine óz nusqalary boıynsha sımvolıkalyq qurama komandada óner kórsetýge laıyq dep tapqan oıynshylardyń tizimin berip otyrǵan. Ramazan Orazov pen Oralhan Ómirtaev bul tizimderge basqalarǵa qaraǵanda jıi túsken»6 - delingen habarlamada.
«Bul jańalyqty estigende qýanyshymda shek bolmady. Men Álem quramasyna shaqyrylǵan alǵashqy «qaırattyq» oıynshy ekenmin. Bul men úshin qol jetpes arman bolatyn. Bul týrnır men úshin birinshi kezekte úlken tájirıbe. Óıtkeni onda ózimmen jasty álemniń eń úzdik oıynshylarymen oınaımyn. Sondaı-aq, týrnırde basqa klýbtardyń qalaı jattyǵatynyn kóretin bolamyn. Endi jaqsy oınaý úshin bar kúshimdi salamyn. Al jattyqtyrýshylarym Alekseı Ignatchenko, Maksım Shevchenko jáne Konstantın Gorovenkoǵa alǵysymdy bildiremin», - dedi Ramazan Orazov.
Aıta ketelik, týrnır 2015 jyldyń 5-15 aqpany aralyǵynda Katardyń Doha qalasynda ótedi.
Oǵan «Real Madrıd» (Ispanııa), PSJ (Frantsııa), «ıÝventýs» (Italııa), «Aıaks» (Nıderlandy), «Boka Hýnıors» (Argentına), «Porto» (Portýgalııa), «Manchester Sıtı», «Lıverpýl» (Anglııa) komandalary men Japonııa, Egıpet, BAÁ, Saýd Arabııasy jáne Katar sekildi elderdiń jasóspirimder quramasy qatysady dep kútilýde.
