«Qaırat» fýtbol klýby týraly tuńǵysh anıme ázirlenip jatyr
ASTANA. KAZINFORM – Týyndy qazaq, aǵylshyn jáne qytaı tilderinde jaryqqa shyqpaq. Joba avtory Jibek Joly telearnasynyń «Búgin LIVE» baǵdarlamasyna qonaq bolyp, anımatsııalyq fılmdi tanystyrdy.
– Ózim bala kezden anımatsııalyq rolıkterge qatty qyzyǵamyn. Eseıgen soń, sońǵy 10 jylda anımatsııa, kontent daıyndaý, jasandy ıntellekt boıynsha jumys istep kele jatyrmyn. Osy qabiletterim men balalyq qyzyǵýshylyǵym ushtasty. Mundaı qıyn anımatsııalardy batystyń stýdııalarynsyz, úlken bıýdjetsiz-aq kez kelgen adam úıinde otyryp jasaı alatynyn kórsetkimiz keldi. Sol maqsatta tarıhy baı «Qaırat» klýbyna arnap anımatsııalyq fılm jasap jatyrmyz, - deıdi Ǵabıt Qojahmet.
Jańa anıme tolyqtaı jasandy ıntellektiniń kómegimen ázirlenip jatyr.
– Jalpy, anımede belgili bir keıipkerdiń bet-álpetin keltirip jasamaıdy. Sebebi, 1 sekýndta 24 kadr bolsa, 24 sýret salady. Demek, 1 mınýtta ol 1440 sýret salýy kerek bolady. Bul — óte úlken jumys. Nege anımelerdiń bıýdjetteri 100 mln dollar bolady? Sebebi, onyń sýretin myńdaǵan adam birneshe jyl boıy salady. Al qazirgi tańda JI-dyń arqasynda ony jyldam jasaýǵa bolady. Óziniń jumys isteý metodıkalary bar, - deıdi stýdııa qonaǵy.
Joba avtory anımatsııalyq fılmdi jasaýdyń ádis-tásilderine toqtaldy.
– Búginde komandada 10 adam jumys istep jatyr. Al naqty anımatsııamen 4 adam aınalysady. Anımatsııa jasaý birneshe kezeńnen turady. Birinshi kezeń — stsenarıı-sınopsıs, artynan kadrlarǵa bólý, keıin nobaıyn salamyz. Ony istegennen keıin jumys ekige bólinedi. Biz únemi kadrda bolatyn keıipkerlerdiń 3D formatyn shyǵaryp, tekstýrasyn jasaımyz. Al kóp kezdespeıtin personajdardy tek generatsııadan ótkizemiz. Osyndaı ádis-tásilderdi qoldanyp, nátıje shyǵarýǵa tyrysyp jatyrmyz, - deıdi JI mamany.
Ǵabıt Qojahmet anımeniń jastarǵa bereri kóp ekenin aıtady.
– Anımeniń maqsaty — jas býynnyń sportqa, tártipke degen shabytyn ashý. Sol úshin bul jobada biz akademııa bóligine, jastardyń fýtboldy oqyp, daıyndyq jasaý barysyna kóp kóńil bólip jatyrmyz. Árıne, «Qaırattyń» shetelde oınaǵan kóptegen oıyndarynyń da bólikteri bolady. Tarıhı derekter men vıdeolar tym az bolǵandyqtan, ókinishke qaraı, tap sol jerdegi áserdi berý qıynǵa soǵyp jatyr. Dese de, jankúıerlerdiń túsirgen vıdeolaryn ár jerden jınaqtap, sol atmosferany naqty jetkizýge tyrysyp jatyrmyz, - deıdi avtor.
Týyndy qytaılyq jelilerde de jaryq kórmek.
– Anıme birden 3 tilde shyǵady. Qazir qazaq tilinen bólek, aǵylshyn, qytaı tilderinde istelip jatyr. Bizde qazaq tilinde jarııalanady. Aǵylshyn tilinde YouTube syndy platformalarǵa júkteımiz. Al Qytaıdaǵy áleýmettik jelilerge qytaı tilindegi nusqasyn usynamyz, - deıdi maman.
Stýdııa qonaǵy jobany sapaly etip daıyndaý úshin «Qaırat» fýtbol klýbynyń basshylyǵymen seriktestik ornatqysy keledi.
– Ázirge «Qaırat» klýbynyń basshylyǵymen tikeleı baılanyspadyq. Biraq jaqynda olarǵa hat jazyp jibergenmin. Sebebi, bastapqyda olardyń qatysýynsyz isteı salýdy josparlaǵanbyz. Biraq, anımatsııada adamnyń betiniń qımyl-qozǵalysy, emotsııasyn uqsatý úshin topologııa isteý qajet. Sol úshin biz sońǵy kezderi tanymal bolyp jatqan qaqpashy Anarbekovti shaqyryp, birneshe vıdeoǵa túsirip alýǵa usynys jasadyq. Aldaǵy ýaqytta seriktes bolady degen úmittemin, - dep túıindedi Ǵabıt Qojahmet.
Aıta keteıik, UEFA Chempıondar lıgasy aıasynda ótetin «Sportıng» pen «Qaırat» kezdesýin Qazaqstan ýaqytymen 00:00-de «Qazaqstan» telearnasynan tamashalaýǵa bolady.