«Qaırat» fýtbol klýbynyń bas bapkeri Kırıll Keker qyzmetinen ketti

ALMATY. KAZINFORM – Almatylyq «Qaırat» fýtbol klýbynyń bas bapkeri Kırıll Keker qyzmetinen ketti.

«Qaırat» fýtbol klýbynyń baspasóz qyzmetinen málim etkenindeı, 44 jastaǵy maman óz betimen jumystan ketemin degen sheshim qabyldady.

«Keker negizgi komandany 2022 jylǵy maýsymnan bastap basqardy. Onyń jetekshiligimen «sary-qaralar» 60 match ótkizip, onyń 29-ynda jeńiske jetip, 15 kezdesýde teń tústi. 16 ret qarsylastaryna ese jiberdi. Osy kezeńde «Qaırat» FK akademııasynyń 13 túlegi negizgi komanda sapynda alǵashqy oıynyn ótkizdi. «Sary-qaralardyń» ujymy Kırıll Sergeevıchke atqarǵan jumysy úshin shyn júrekten alǵys aıtyp, kásibı qyzmetinde odan ári tabysqa jete berýin tileıdi. Aldaǵy 4 mamyrda ótetin «Atyraýmen» bolatyn matchqa komandany buǵan deıin «Qaırat-Jastarǵa» basshylyq etken Rafael Ýrazbahtın daıyndaıdy», delingen resmı málimdemede.

Eske sala keteıik, budan buryn «Qaırattyń» kósh sońyndaǵy «Qaısardan» utylǵanyn jazǵan bolatynbyz.

Sondaı-aq fýtboldan el chempıonatynda «Jetisý» kósh basyndaǵy «Aqtóbeni» utty.