«Qaırat» FK basshylyǵy reseılik fýtbolshy A. Arshavınmen kelissóz júrgizip jatqandyǵyn málimdedi (FOTO)
ALMATY. QazAqparat - Búgin Almatyda jańa fýtbol maýsymyna baılanysty ótkizilgen arnaıy baspasóz máslıhaty barysynda «Qaırat» FK basshylyǵy reseılik fýtbolshy Andreı Arshavınmen kelissóz júrgizip jatqandyǵyn málimdedi.
«Arshavın qazir Almatyda, komandamen birge jattyǵyp júr. Biz onymen áli de kelissóz júrgizip jatyrmyz. Ýaqyt áli bar. Arshavın kezinde Reseı quramasynyń kapıtany, sońǵy 10 jyl ishinde otanynda eń úzdik fýtbolshylardyń biri bolǵan. Almatyǵa ol óz erkimen keldi. Komandamen jaqyn tanysyp, qalany aralap kórgisi keledi. Arshavın Almatyǵa kelmeı turyp-aq, biz onymen uzaq ýaqyt kelissóz júrgizgenbiz. Ol durys sheshim qabyldaǵysy keledi, tipti sporttyq mansabyn aıaqtaýy da múmkin. Men qazir Arshavınniń qandaı sheshim qabyldaıtyny jaıynda eshteńe aıta almaımyn. Onyń kelgeniniń ózi aıtýly ýaqıǵa. Bul bizdiń klýbty, bas bapkerdi syılaıtyndyǵyn bildiredi», - dedi «Qaırat» FK Baqylaý keńesiniń tóraǵasy Qaırat Boranbaev.
Óz kezeginde komandanyń jańa bapkeri Aleksandr Borodıýk te Arshavınge qatysty óz pikirin bildirdi.
«Men bul fýtbolshyǵa úlken qurmetpen qaraımyn. Ol fýtboldyń damýyna kóp eńbek sińirgen oıynshy. Onyń kelýi «Qaırat» úshin úlken mańyzǵa ıe. Eger ol komanda quramynda óner kórseter bolsa, jas fýtbolshylar odan kóp nárse úırenedi dep oılaımyn», - dedi A. Borodıýk. 
