«Qaırat» eýrokýbok oıyndarynan 2 mlrd teńge tabys tapty
ASTANA. KAZINFORM – Almatynyń «Qaırat» fýtbol klýby 2026/27 jylǵy eýrokýbok maýsymynda shamamen 2 mlrd teńge tabys tapty, dep habarlaıdy Sports.kz.
Konferentsııalar lıgasynyń jalpy kezeńindegi úshinshi týrda «Qaırat» ıtalııalyq «Atalantamen» 1:1 esebimen teń tústi. Osy nátıjeniń arqasynda almatylyq klýb ÝEFA tarapynan qosymsha syıaqy alady.
Jalpy kezeńde «Qaırat» eki kezdesýdi teń aıaqtaǵan. Ár teń oıyn úshin klýbqa 133 myń eýrodan (67,1 mln teńge) tólenedi.
– «Qaırat» Konferentsııalar lıgasynyń jalpy kezeńine shyqqany úshin 3,17 mln eýro (1,6 mlrd teńge) tabys tapty. Buǵan deıin klýb Chempıondar lıgasynyń úsh irikteý kezeńine qatysqany úshin 525 myń eýro (264,9 mln teńge) syıaqy alýǵa múmkindik alǵan. Osylaısha almatylyq komandanyń qazirgi jalpy tabysy 3,961 mln eýroǵa nemese shamamen 2 mlrd teńgege jetti, – delingen aqparatta.
Bul somaǵa klýbtyń Konferentsııalar lıgasynyń jalpy kezeńine joldama alǵany, Chempıondar lıgasynyń irikteý satylaryna qatysqany jáne eki kezdesýde teń túskeni úshin beriletin syıaqylar kiredi.
Aıta keteıik, buǵan deıin «Qaırattyń» 2025/26 jylǵy maýsymda Chempıondar lıgasynyń negizgi kezeńine qatysqany úshin 18,62 mln eýro kóleminde syıaqy alǵany habarlanǵan bolatyn.
