«Qaırat» Dastan Sátpaevtyń komandadaǵy bolashaǵyna qatysty sheshim qabyldady

ALMATY. KAZINFORM – Eki aı boıy jattyǵýlar men matchtardy ótkizip alǵan 17 jastaǵy fýtbolshy Dastan Sátpaev almatylyq "Qaırat" komandasynyń aldaǵy Túrkııadaǵy oqý-jattyǵý jıynyna shaqyryldy.

Komandanyń resmı habarlamasynda 3 aqpanda «Qaırattyń» Túrkııaǵa attanatyny aıtylǵan. Belek qalasynda 20 aqpanǵa deıin jańa – 2026 jylǵy maýsym aldyndaǵy qorytyndy oqý-jattyǵý jıyny ótedi.

Jıynǵa shaqyrylǵan oıynshylar tizimine klýbpen qoldanystaǵy kelisimsharty bar barlyq fýtbolshy engizilgen.

Qańtar aıynda Birikken Arab Ámirlikterinde ótken alǵashqy jıynmen salystyrǵanda, bul joly komandadaǵy jas kóshbasshylar – Dastan Sátpaev, Oljas Baıbek jáne Azamat Tuıaqbaev shaqyrtý aldy. Sonymen qatar, jıynǵa 17 jastaǵy Abylaı Tóleýhan da qosyldy. Ol eresekter komandasynyń jattyǵýlaryna alǵash ret qatysady.

Eske salaıyq, Dastan Sátpaev 2025 jylǵy jeltoqsan men 2026 jylǵy qańtar aılarynda alǵan jaraqatyna baılanysty «Qaırattyń» jattyǵýlary men matchtaryna qatyspaǵan bolatyn. Ol qazan aıynda alǵan jaraqatynan keıin ońaltý kezeńinen ótken.

Jańa maýsymǵa daıyndyq aıasynda birneshe baqylaý matchyn ótkizý josparlanyp otyr. Qarsylastar men matchtardyń naqty kúnderi jaqyn arada jarııalanady.

Aıta keteıik, Dastan Sátpaev 17 jastaǵy oıynshylar arasynda álemdik TOP-5 tizimine endi. Sonymen qatar UEFA Chempıondar lıgasynda gol soqqan eń jas oıynshylar úshtigine kirdi.