«Qaırat» Chempıondar lıgasynda «Levskıge» ese jiberdi
ASTANA. KAZINFORM - Qazaqstandyq «Qaırat» (Almaty) fýtboldan UEFA Chempıondar lıgasy úshinshi irikteý kezeńinde «Levskı» (Sofııa, Bolgarııa) komandasymen alǵashqy oıynyn ótkizdi.
Kezdesý barysynda komandalar alǵashqy mınýttan jyldam gol soǵý múmkindigin izdedi. Aldymen bolgarııalyq komanda birneshe qaýipti sátti uıymdastyrdy. Oǵan almatylyq klýb laıyqty toıtarys bere bildi. Keıbir sátte qorǵaýshylar saýatty oınasa, endigi bir mezette Temirlan Anarbekov dopty keıin qaıtaryp úlgerdi.
Ekinshi kezeńde de qos komanda esep ashýǵa umtyldy. Oıynnyń 92-mınýtynda «Levskı» sapynan Serjıno soqqan jalǵyz gol kezdesý taǵdyryn sheshti.
Osylaısha «Qaırat» qarsylasyna 0:1 esebimen ese jiberdi.
Endi qarymta oıyn 11 tamyzda Túrkistan qalasyndaǵy «Túrkistan-arena» stadıonynda ótkiziledi.
Almatylyq klýb qazirge deıin birinshi jáne ekinshi irikteý kezeńderinde Chernogorııanyń «Sýteska» (2:1, 2:0), «Omonııa» (1:0, 0:1, penaltıden 6:5) klýbtaryn qapy qaldyrǵan edi.
Pleı-off kezeńine shyqqan jaǵdaıda almatylyq ujym Grekııanyń AEK klýbymen kezdesýi múmkin. Bul oıyndar 18-19, 25-26 tamyz kúnderine belgilengen.
Almatylyq ujym Chempıondar lıgasynda «Levskıden» jeńilgen jaǵdaıda Eýropa lıgasy pleı-off kezeńinde synǵa túsýge múmkindik alady. Bul týrnırde olar PAOK (Grekııa) - «Anderleht» (Belgııa) jubynyń jeńimpazymen oınaıdy.
Aıta ketsek, almatylyq klýb ótken maýsymda Chempıondar lıgasynyń negizgi kezeńinde Portýgalııanyń «Sportıng» (1:4), Ispanııanyń «Real Madrıd» (0:5), Italııanyń «Inter» (1:2), Grekııanyń «Olımpıakos» (0:1), Danııanyń «Kopengagen»( 2:3), Belgııanyń «Brıýgge» (1:4), Anglııanyń «Arsenal» (2:3) klýbytaryna jol berse, Kıprdiń «Pafosymen» 0:0 esebimen teń túsken edi.
