«Qaırat» bul maýsymda jaqsy oıyn-órnegimen kózge túsýge barlyq kúsh-jigerin jumsaıdy - Nursaıyn Joldasov
ALMATY. 8 naýryz. QazAqparat /Erlik Erjanuly/ - Aldynda aıqyn maqsaty bar adam eshqashan bir ornynda turmaıdy.
«Qaırat» fýtbol klýbynyń №14 qorǵaýshysy Nursaıyn Joldasov keshe Almatyda ótken komandany tanystyrý rásiminde osyndaı pikir bildirdi.
«Byltyr negizgi quramda 10 oıyn ótkizdim. Byltyrǵy «Qaıratta» esimi elimizge áıgili fýtbolshylar sanaýly edi. Bıyl shet elden birqatar oıynshylar tartyp otyrmyz. Jaqsy óner kórsetýge tyrysamyz. Legıonerdiń bári oıyn-órnegi joǵary oıynshylar. Biz de óz tarapymyzdan solardyń deńgeıine jetýge tyrysamyz. Qudaı qalasa olar bizge maýsymdy jaqsy ótkizýge kómek kórsetedi dep oılaımyn», - deıdi N.Joldasov. Buǵan deıin Shymkenttiń «Ordabasy» komandasynda 3 jyl óner kórsetken ol bul komanda bıyl Sýperkýbokty ıelengen kezde jerlesterin jeńisterimen quttyqtap, jaqsy tilekterimen bólisken kórinedi. «Ordabasydan» ketkenine esh ókinbeıtinin, onda júrip jastar quramasynda baq synaýǵa múmkindik alǵanyn aıtqan 20 jasar oıynshy endi «Qaıratta» ózindik oıyn-órnegin kórsetýge barlyq kúsh jigerin jumsamaq.
«Úlgi alatyn oıynshylardan komanda kapıtany Rýslan Baltıevti erekshe atap aıtqym keledi. Eger «Qaırat» úlken otbasy bolsa Baltıevty onyń úlken balasy dep sanaýǵa bolady. Árdaıym kórgen, bilgenimen bólisip, úıretip otyrady. «Juldyz» aýrýy boıynda múlde joq. Meniń endigi armanym - ulttyq qurama sapynda óner kórsetip, álemge elimizdi tanytý», - deıdi Nursaıyn Joldasov.
