«Qaırat» búgin Chempıondar lıgasynda «Levskımen» alǵashqy oıynyn ótkizedi
ASTANA. KAZINFORM - Qazaqstandyq «Qaırat» (Almaty) UEFA Chempıondar lıgasy úshinshi irikteý kezeńinde «Levskı» (Sofııa, Bolgarııa) komandasymen alǵashqy oıynyn ótkizedi.
Bul kezdesý 4 tamyz kúni Qazaqstan ýaqytymen 22:30-da bastalyp, «Qazsport» telearnasynan tikeleı efırde kórsetiledi.
Matchqa lıtvalyq tóreshiler brıgadasy bekitilgen. Bas tóreshi – Donatas Rýmshas, oǵan otandastary Aleksandr Radıýs pen Dovıdas Sýjedelıs kómektesedi.
Tórtinshi tóreshi - Robertas Valıkonıs. Bas tóreshiniń beıneqaıtalaý kómekshisi shveıtsarııalyq Fedaıı San bolsa, beıne qaıtalaý kómekshisiniń assıstenti - Kestýtıs Bartýshkıavıchıýs.
Qarymta oıyn 11 tamyzda Túrkistan qalasyndaǵy «Túrkistan-arena» stadıonynda ótkiziledi.
«Levskı» – Bolgarııanyń baıyrǵy klýbtarynyń biri. El astanasy – Sofııa qalasynda 1914 jyly qurylǵan komanda sodan beri 27 márte chempıondyq ataqqa ıe bolsa, kýbokta da dál sondaı kórsetkishti baǵyndyrdy. Oǵan qosa joǵary dıvızıonnan birde-bir márte túsip kórmegen jalǵyz klýb retinde erekshelenedi. Soǵan qaramastan eýrokýbok oıyndarynda jıi boı kórsete bermeıdi. Sońǵy ret olar 2010/2011 jylǵy maýsymda Eýropa lıgasynda baq synaǵan edi.
«Levskı» qazaqstandyq klýbtarmen buǵan deıin bir márte jolyǵyp úlgerdi. Bul kezdesýde on jyldaı buryn bolǵan edi. 2013/2014 jylǵy maýsymda Eýropa lıgasy birinshi irikteý kezeńinde olar pavlodarlyq «Ertispen» sheberlik baıqasty. Bolgarııada ótken alǵashqy kezdesýde qarsylastar 0:0 esebine qanaǵat bildirse, Pavlodarda alań ıeleri 2:0 esebimen basym tústi.
Nátıjesinde bolgarııalyq komanda jarys jolynan shyǵyp qaldy.
Almatylyq klýb qazirge deıin birinshi jáne ekinshi irikteý kezeńderinde Chernogorııanyń «Sýteska» (2:1, 2:0), «Omonııa» (1:0, 0:1, penaltıden 6:5) klýbtaryn qapy qaldyrǵan edi.
Pleı-off kezeńine shyqqan jaǵdaıda almatylyq ujym Grekııanyń AEK klýbymen kezdesýi múmkin. Bul oıyndar 18-19, 25-26 tamyz kúnderine belgilengen.
Almatylyq ujym Chempıondar lıgasynda «Levskıden» jeńilgen jaǵdaıda Eýropa lıgasy pleı-off kezeńinde synǵa túsýge múmkindik alady. Bul týrnırde olar PAOK (Grekııa) - «Anderleht» (Belgııa) jubynyń jeńimpazymen oınaıdy.
Aıta ketsek, almatylyq klýb ótken maýsymda Chempıondar lıgasynyń negizgi kezeńinde Portýgalııanyń «Sportıng» (1:4), Ispanııanyń «Real Madrıd» (0:5), Italııanyń «Inter» (1:2), Grekııanyń «Olımpıakos» (0:1), Danııanyń «Kopengagen»( 2:3), Belgııanyń «Brıýgge» (1:4), Anglııanyń «Arsenal» (2:3) klýbytaryna jol berse, Kıprdiń «Pafosymen» 0:0 esebimen teń túsken edi.
