Qaırat Boranbaevtyń burynǵy munaı kompanııasy jekeniń qolyna ótedi

ASTANA. KAZINFORM – Buryn Qaırat Boranbaevqa tıesili bolǵan, qazir memleket balansyndaǵy, dálirek aıtsaq, «Samuryq-Qazyna» qorynyń basqarýyndaǵy Phystech II kompanııasyn qaıtadan jekeniń qolyna berý kózdelip otyr. Bul týraly Úkimettiń baspasóz qyzmeti málim etti. 

Tıisti qaýlyǵa Premer-Mınıstr Oljas Bektenov qol qoıdy. Qujatpen osy jerden tanysa alasyz.

— Ulttyq basqarýshy holdıngterdiń, ulttyq kompanııalardyń jáne olarmen úlestes bolyp tabylatyn ózge de zańdy tulǵalardyń basym tártippen básekeles ortaǵa berý usynylatyn iri enshiles, táýeldi uıymdarynyń tizbesinde: «Samuryq-Qazyna» ulttyq ál-aýqat qory» aktsıonerlik qoǵamy» degen bólim mynadaı mazmundaǵy rettik nómiri 9-1.7-1-jolmen tolyqtyrylsyn, — delingen qaýlyda.

Eske sala keteıik, Qaırat Boranbaevtyń munaı kompanııasy 2023 jyldyń qazan aıynda 35 mıllıard teńgege memleket menshigine ótkenin jazǵan bolatynbyz. Qazir kompanııa «Samuryq-Qazyna» qorynyń basqarýynda, biraq qujat boıynsha ol qaıtadan jeke menshikke ótedi.

Jekeshelendirý eki kezeńdi ashyq konkýrs, elektrondy tender nemese tikeleı maqsatty satý arqyly júzege asyrylýy múmkin.

Buǵan deıin «Samuryq-Qazyna» qoryna qarasty kompanııalardyń ІRO-daǵy ahýaly qalaı ekenin jazǵan edik.